شال: پہ زور بیگواھیں مردمانی پدجنگ ءَ شدکشیں زھرشانی گدان ءَ 5372 روچ سرجم بوتگ۔ پنچ شمبے ءِ روچ ءَ بی ایس او ءِ سرکماش بالاچ کادر گوں وتی آدگہ ھمبلانی ھمراھی ءَ پہ ھمدردی درشان کنگ ءَ گدان ءَ آتکگ۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ جھان ءِ تہ ءَ ھمک کار چہ یک سوبے ءَ بندات بیت، پد ءَ ایشی پژدر ءَ یک جھدے برجاہ بیت۔ ھما جاہ ءَ کہ ھونریچی بوت اود ءَ ھکءُراستی ءِ بو ودی بیت، زوراکی ءِ بگیری ءَ کینگداری گیش بوان کنت۔
آئی ءَ گوشتگ کہ زوراکی ءِ پسو گوں زور ءَ دیگ بیت، زوراک ءِ مرگ ایردست ءِ زندمان ءِ ایمنی مانزمان بیت۔ جنگ وھدے کہ بندات بیت گڑا دوئیں نیمگاں لاش کپ اَنت۔ زوراک مدام پہ وتی زور گپتی ءِ دراجکش کنگ ءَ نزوریں راج ءِ ھوناں ریچ ایت۔
ماما کدیر گوشتگ کہ وھدے لاش ءِ کپگ گیش بوت گڑا ترس گوں کینگ ءَ مٹ بیت، کینگ ءِ یک ھدے بیت، کینگ چنچو گیش بوت گڑا مرگ ءِ ترس ھمنچو ھلاس بیت۔ کینگداری ءَ وتی سیمسر گواز کرت گڑا کار ءِ سپر بندات بیت۔ بلوچ چاگرد ءِ تہ ءَ کجام مردم چہ دژمن ءَگیش کینگدار اِنت آ گیشتر کار کنگ ءَ اِنت۔
