بلوچ یکجھتی کمیٹی ( کراچی ) ءِ جارکش ءَ وتی شنگ کرتگیں درشانے ءَ گوشتگ کہ سے شمبے ءِ روچ ءَ چہ کراچی ءَ ھور ءُ ھاراں سانمند بوتگیں پہ سد گساں راشن دیم داتگ کہ آ چار شمبے ءِ شپءِ تھاری ءَ پہ اسپیت پوشاکیں مردمانی گساں راشن سرکنگ بوتگ اَنت۔
آئی ءَ دیمتر ءَ گوشتگ کہ ما سوڑگ کرتگ ما 2022 ءِ وڑ ءَ گوادر ءِ کر ءُ کشانی ھوراں ھار آماچ بوتگیں بلوچ راج ءِ گون ءَ اوشتاتگیں ءُ اے وھد ءَ پنچ باسکی پترے جوڑ کرتگ کہ آئی گوادر ءِ کر ءُ کشاں راھوت کنگ بندات کرتگ۔ پتر ءَ ھمے سوڑگ کرتگ چہ شھری ھنداں ابید ھما ھندانی تہ ءَ کار کن ایں کہ آ چہ شھر ءَ کمو دور اَنت ءُ گیش سانمند اَنت۔ مئے لڑا پلیری، پراہ توک، پیشکان، گنز،کپر ءُ لھتیں ھند اَنت۔
آئی ءَ گوشتگ انچوش کہ بی وائی سی ( کراچی ) ءَ وتی ٹویٹر ءُ پیسبک ءَ ھمے جار جتگ کہ مارا گیش کمک نہ رسگ ءِ سوب ءَ ما پہ سد گساں راشن یکجاہ کرتگ۔ پتر ءَ ھمے سوڑگ کرتگ کہ اے سدگسانی راشن یک ھندے ءَ بس نہ بنت کم چہ کم اسپیت پوشاکیں مردمانی کار ءَ کاینت کہ آ سانمند اَنت ءُ چہ وردن ءَ زبھر اَنت۔
جارکش ءَ گوشتگ کہ ما چہ سپر ءَپیش ھندی مردمانی گون ءَ رھوت کرتگ ءُ پیشکان ءَ اسپیت پوشانی لڑ جوڑ کرتگ ءُ ھمبل گوں راشناں ھوار دیم داتگ اَنت۔ ھمبل چارشمبے ءِ سھب ءَ گوادر ءُ چارشمبے ءِ شپ ءَ پیشکان ءَ سربوتگ اَنت ءُ شپ ءِ تھاری ءَ مردمانی گس ٹک اتگ اَنت ءُ راشن داتگ اَنت۔
جارکش ءَ دیمتر ءَ گوشتگ کہ ما کمک کار برجاہ داشتگ اَنت ءُ اکاونٹ ءَ ھوار ھندانی تہ ءَ ھمبل سامان مچ کنگ ءَ اَنت۔ راج ءِ گون ءَ لوٹ کن ایں کہ پہ گوادر ءِ مردماں کمک ءَ مئے ھمراھداری ءَ بہ کن اَنت۔ ما زوت وتی آدگہ کمکاں داں ھارآماچیں مردماں سرکن ایں۔ اے وھد ءَسانمندیں مردماں راشن، کمبل ءُ سامان درکار اِنت۔
