بلوچ راج زْرمبشت ( بی این ایم ) ءِ سرکماش ڈاکٹر نسیم ءَ چہ سی امریکی کانگریس ءِ باسکانی نیمگ ءَ پاکستانی سرکار ءِ نہ منگ ءِ لوٹ ءِ پدگوانک ءَ گپ جنان اے نیکیں پالے لیک اتگ۔
آئی ءَ گْوشتگ اے بلوچ راجی زْرمبشت ( بی این ایم ) ءِ دیدانک ءِ پلہ مرزی اِنت کہ آئی ءَ دو دھک ءَ پیش پاکستانی بست ءُ بند ءِ تہ ءَ پارلیمانی سیاست بے آسریں جھدے لیک اتگ ءُ در پارلیمانی سیاست گچین کرتگ اَت۔مروچی پاکستان ءِ سیاست ءِ مزنیں نام ھم چہ پارلیمانی سیاست ءَ یک کر بیگ ءِ گپ ءَ جنگ ءَ اَنت پرچا کہ پاکستان ءَ راجمستری شتلی یے ءُ زیردستیں راجانی سر ءَ زورگری ءِ روا کنگ ءِ پندلے۔
سرکماش ءَ گْوشتگ امریکی گانگریس ءِ باسک مروچی ایشی ءِ سر ءَ گپ جنگ ءَ اَنت کہ امریکا اے رنگیں ڈیھانی کمک مہ کنت کہ راجمستری ءُ مردمی اگبالانی بگیر اَنت۔ اے اوست دیوکیں مٹی یے ءُ آیاں اے سرھال ءِ گپانی تہ ءَ’ بلوچستان ءِ جیڑہ ‘ ءِ سر ءَ ھم تْران کنگ لوٹ ایت۔اد ءَ پاکستانی لشکر مردمی اگبالانی بدتریں رنگے ءَ لگتمالی کنگ ءَ اِنت۔ بلوچستان ءِ سر ءَ مردمی کشیں رمب ءِ سروک ’ سرپراز بگٹی ‘ نام گپتیں سروزیر جوڑ کنگ ءُ مردمانی سر ءَ مشگ بیتگ کہ مزنیں بدکرد ءُ بلوچ راج ءِ کشندہ اِنت۔
آئی ءَ گْوشتگ امریکی کانگریس ءِ پرمنگھیں باسک گریک کاسار راستیں مزروے ءَ جیڑگ ءَ اِنت کہ بدبھتی ءَ امریکا ءَ جھان ءَ انچیں واکدارانی کمک کرتگ کہ آیاں راجمستری ءُ مردمی اگبالانی پروا نہ داشتگ۔ پاکستانی آمر پرویز مشرپ ءَ امریکی پلہ مرزی گون اَت کہ آئی ءَ ماں بلوچستان ءَ بلوچ راج ءِ چکچینی گیش کرت ءُ پہ بی این ایم ءِ رنگیں پرایمنیں سیاسی گلاں پرایمنیں سیاست ءِ دروازگ بند کرت اَنت۔
بی این ایم ءِ سرکماش ءَ گْوشتگ زور بیگواھی مردمگری ءِ بگیر ءَ میارے لیکگ بیتگ ، بلے پاکستانی لشکر ھم روچ بلوچاں زور بیگواہ کنگ ءَ اِنت۔امریکی کانگریس، مھتر جوبائیڈن ءُ دری کارانی کارگشاد انٹونی بلنکن پاکستان ءِ جست ءُ پرس ءُ گر ءُ دار ءَ وتی کرد ءَ پیلو بہ کن اَنت داں اد ءَ بلوچ ءِ چکچینی دارگ بہ بیت۔
