کراچی: بلوچ یکجھتی کمیٹی ءِ نیمگ ءَ بلوچ دود ءُ ربیدگی روچ ءَ چہ آرٹس کونسل ءَ داں کراچی پریس کلب ءَ روانکے کشگ بوتگ۔ روانک ءَ بیگواھیں بلوچانی توار ( وی بی ایم پی ) ءِ کارگشاد ءُ زور بیگواھیں ڈاکٹر دین مھمد ءِ جنک سمی دین، زور بیگواھیں شبیر بلوچ ءِ گھار سیما، بلوچ یجھتی کمیٹی ءِ سروک آمنہ ءُ وھاب ءَ ھوار سیاسی ءُ چاگردی کارکن ءُ جتائیں بھرگاں سیادی داروکیں مردماں بازیں کچے ءَ بھر زرتگ۔
روانک ءَ ھواریں مردماں شھید ءُ زور بیگوھیں مردمانی اکس،بینر ءُ پلے کارڈ گوں بوتگ، پلے کارڈانی سر ءَ جتا جتائیں اوگام نبشتہ بوتگ۔ آیاں زوریں بیگواھی ءِ بگیریءَ اوگام جتگ ءُ بیگواھیں مردمانی آجوئی ءِ لوٹ کرتگ۔
آیاں تران کرتگ ءُ گوشتگ کہ اے روچ ھما شھید ءُ زور بیگواھیں مردمانی نام ءَ اِنت کہ آ راجدوست ، زبان ءُ دودمان دوست بوتگ اَنت۔ آپہ راجی پجار ءُ دودمان ءِ رکینگ ءَ شھید ءُ زور بیگواہ کنگ بوتگ اَنت۔ مرچی مارا ھما جھد برجاہ دارگ ءُ دیم ءَ برگی اِنت۔
آیاں گوشتگ کہ اگاں ما ءُ شما وت ءَ بلوچ گوش ایں ءُ بلوچ دود ءُ ربیدگانی رکینگ ءِ گپ ءَ کن ایں گڑا مارا توار چست کنگ ءُ گھگیری کنگی اِنت۔ پہ یک روچے ءِ بلوچ پیش دارگ ءَ ما وتی دودمان ءَ رکینت نہ کن ایں ، پہ دودمان ءِ رکینگ ءَ ھمک وھد ءَ زوراک ءِ دیم پہ دیمی ءَ گھگیری کن لوٹ ایت۔
آیاں گوشتگ کہ ما زوراکیانی بگیری ءَ ھمک وھد ءَ وتی گھیگری برجاہ داشت اَنت گڑا ما وتی دود مان رکینت کن ایں پہ یک روچے ءِ دارگ ءَ دود ءُ ربیدگ رکینگ نہ بنت۔ وھد ھمیش اِنت کہ پاد بیا اِت ءُ وتی مات ءُ گھارانی توار جوڑ بہ بہ اِت۔
