گوادر: بلوچ یکجھتی کمیٹی ءِ سروک ڈاکٹر ماہ رنگ ءَ گودر ءَ ھار آماچیں مردمانی ھال پرسی ءَ شتگ ءُ تر ءُ گرد ءِ میان ءَ پہ ھارآماچیں مردمانی کمک کنگ ءَ وتی تامربندے شنگ کرتگ۔
ڈاکٹر ما ہ رنگ ءَ گوں بلوچ راج ءَ دلگوش گور کرتگ ءُ گوشتگ کہ گوادر چہ وتگڑیں دیمروئی دوست ءُ چہ میگا پروجیکٹ ءِ سوب ءَ بڈ اتگ ءُ مردم بےگس اَنت۔ مئے پشت ءَ پی سی ھوٹل اِنت ءُ آ نیمگ ءَ پورٹ اِنت، ھما پورٹ کہ آئی نام ءِ سر ءَ ریاست ءُ آئی مشینری ھمے دروگ ءَ بند اَنت پاکستان ءَ گوادر دیمروئی داتگ۔ ھمے ریاست ءِ نابودی ءَ بلوچ ءِ سد سال کوھنیں شھر ھم بڈ اتگ۔
آئی ءِ گوشتگ کہ من شمارا ھمے گوش لوٹاں ھما کہ زندگ ءُ باسمائیں راج بنت وتی راج ءِ جنجالانی وھد ءَ وتی مردماں کمک کن اَنت۔ اد ءَ پہ اے مردمانی کمک کنگ ءَ کس نہ ایت، ھمے گوادر ءِ مردم وتی کمک ءَ وت مچ بوتگ اَنت۔ سرکار ءَ مردم کمک نہ کرتگ اَنت اے مردم چہ شما کمک لوٹگ ءَ اَنت شما بیا اِت ءُ ایشانی کمک ءَ بہ کن اِت۔
ڈاکٹر ماہ رنگ ءَ گوشتگ کہ اد ءَ سدانی کچ ءَ گس آپ ءَ مل اتگ اَنت ءُ ھزارانی کچ ءَ مردم بے گس اَنت، آیانی ھما روزگار کہ دریا اِنت چہ آیاں پلگ بوتگ اَنت۔ ھما لانچ کہ آیانی روزگار ءِ بنشون بوتگ آ ھم پروشگ بوتگ اَنت۔سرکار ءُ آئی مشنیری سرپد بوتگ اَنت کہ اد ءَ اے وڑیں ھورے بوگ ءَ اِنت بلے مردم ھال دیگ نہ بوتگ اَنت۔
آئی ءَ گوشتگ کہ بلوچ یکجھتی کمیٹی گوں شما دزبندی کنت کہ گوادر ءِ مردمان ءَ شمئے کمک درکار اِنت۔ اد ءَ جتائیں نادراھی آتکگ اَنت، زھگاں ءَ پہ ورگ ءَ وردن نیست، من وتی راج ءِ ڈاکٹراں ءَ گوشگ لوٹاں کہ آ اد ءَ بیا اَنت ءُ مردمانی کمک ءَ بہ کن اَنت ءُ مردمان ءَ شمئےکمک درکار اِنت۔
ڈاکٹر ماہ رنگ ءَ گوں مردماں وردن ءِ درمان ءَ ھوار آپی پمپ ءِ لوٹ کرتگ ءُ گوشتگ کہ ھما گس کہ پشت کپتگ اَنت چہ آ گساں آپ کشگ بہ بیت۔ اے مرچیگیں جیڑھے نہ اِنت ، اد ءَ دگہ شھرے جوڑکنگ بوتگ، یک شھرے زورگر ءِ شھر اِنت آیانی شھر برز جوڑ کنگ بوتگ۔ اے شھر بزگیں بلوچانی شھر اِنت اے شھر ھما شھرءِ جوڑ کنگ ءِ سوب ءَ بڈ اتگ۔
ڈاکٹر ماہ رنگ ءَ گوشتگ کہ من گوں شما دزبندی کناں کہ چنچو شمئے وس ءَ بیت اے مردمانی کمک ءَ بہ کن اِت۔ اے درگت ءَ بلوچ یکجھتی کمیٹی زوت وتی جار ءَ جنت۔ پہ اے مردمانی کمک ءَ دگہ سرکار نیست۔
