بلوچ راجی زْرمبشت ( بی این ایم ) ءِ جارکش ءَ بولان ءُ ھم گْوریں ھند سیبی ءُ ھرنائی ءَ لشکر کشی ایرجتگ ءُ گْوشتگ میان استمانی تک ءَ مردمی اگبال پانک ءُ دودمانداریں ڈیھ بلوچستان ءِ سر ءَ بے توار اَنت پمیشکا پاکستان ءَ بلوچستان ءَ کشت ءُ کشار ءِ موہ رسگ ءَ اِنت، ءُ مردمانی زندمان ئِے شزار کرتگ۔پاکستانی لشکر ، لشکرکشی کنگ ءَ اِنت۔ دمگ ءَ راہ ءُ ڈک بند کنگ، مردم انگر کنگ، جنین ءُ چک آزار دیگ بیگ ءَ اَنت۔
جارکش ءَ گْوشتگ انگر کرتگیں میتگانی راہ ءُ در بند اَنت ءُ وراک ءُ وردن آرگ ءِ سر ءَ پابندی اِنت، میتگانی سر ءَ گوں جنگی بالگرداں تیر گواری ءُ گوں ٹوپاں بمب گواری برجاہ اِنت، چہ تیر ءُ بمب گواری ءَ میتگ ءُ مردماں تاوان بیگ ءَ اِنت۔
’’ لشکر ءِ انگر ءُ راہ ءُ ڈکانی بند کنگ ءِ پد ءَ مارا سرجمیں ھال رسگ ءَ نہ اَنت۔‘‘
آئی ءَ گْوشتگ پاکستانی لشکر ءَ بولان ءِ نزیک ءَ سیبی ءِ ھند شابان ءَ ’ الیان‘ نامیں مردمے ءِ لوگ انگر کرتگ، جنین ءُ چک بندیگ کرتگ اَنت۔ ڈاڈر ءِ نزیک ءَ پاکستانی لشکر ءَ مالدار ’مالئے‘ ءُ آئی ءِ سیادانی چک ءُ جنین دزگیر کنگ ءَ پد زور بیگواہ کرتگ اَنت، اے درسیں مردمانی لوگ لشکر ءَ آچ داتگ اَنت۔ سانگان ءِ ھنداں جنگل بن دیگ بیتگ اَنت۔
جارکش ءَ گْوشتگ دہ روچ اِنت کہ لشکر کشی برجاہ اِنت، چہ پاکستانی لشکر ءِ زوراکیاں پہ شھرمننداں جیڑہ ودی بیتگ، لشکریاں لھتے جنین دزگیر کرتگ ءُ پہ وت ءَ اسپر اش جوڑ کرتگ اَنت۔ مردمانی گْور ءَ ورگ نیست ، ٹپی پہ درمان ءَ تلوسگ ءَ اَنت، زور بیگواھیں مردم ءُ چہ لشکرکشی ءَ تاوانبار بیتگیں مردمانی راستیں کچ ءِ بارہ ءَ ھچ سرپدی نیست۔
آئی ءَ دیمتر ءَ گْوشتگ بولان ءُ ھم گْوریں دمگاں مردمانی زند ءِ گزران گوں مالداری ءُ کشاوردی ءَ بندوک اِنت بلے مھترھند ءَ مال ءُ دولت ھم پچ گپتگ اَنت۔
جارکش ءَ گْوشتگ پاکستان بلوچ راج ءِ بگیری ءَ جنگی میار کنگ ءَ اِنت، دست ءُ گوشیں مردمانی بگیری ءَ زوراکی مچی ڈنڈ دیگ ءِ شونداتانی بھر اِنت داں بلوچ راج چہ گھگیر ءُ زْرمبشت ءَ دستکش بہ بیت۔
