نیشنل ڈیموکریٹک پارٹی ءِ نیمگ ءَ بولانءَ ھشت روچ ءِ برجاھیں لشکرکشی ءِ بارو ءَ شنگ کرتگیں درشان ءَ گوشتگ کہ ھپتگے ءَ گیش روچ اِنت کہ ریاستی لشکر کشی برجاہ اِنت۔ ایشی زد ءَ بولان ءِ جتائیں ھنداں ھوار ھرنائی ءُ سبی ھم ھوار اَنت، اے ھنداں گیشتر پھوال اَنت۔
آئی ءَ گوشتگ کہ ھمے وڑ ءَ گوستگیں روچاں بولان ءِ نزیکیں ھند شابان ءَ شپانکاں ھوارلس آبادیانی سر ءَ بیڑ برتگ ءُ مردمانی گس انگر کرتگ اَنت ءُ جنین ءُ زھگ گسانی تہ ءَ بندیگ کرتگ اَنت۔ چہ ایشی پیش ڈاڈر ءِ نزیکیں ھنداں جتائیں جاھاں لس آبادی پھلوال، شپانک ءُ آیانی سیادانی گس انگر کرتگ اَنت ءُ جنین ءُ زھگ دزگیر کرتگ اَنت کہ آ انگت ءَ آجو نہ بوتگ اَنت۔ لشکرکشی ءِ سوب ءَ گیشتریں ھندانی روگ ءُ آھگ بند کرتگ اَنت ھمے سوب ءَ دوریں ھندانی مردماں چہ شھراں درماناں ھوار آدگہ ھژدری چیزانی گرگ ءَ جنجالانی دیمپانی اِنت۔
جارکش ءَگوشتگ کہ ریاست ءِ نیمگ ءَ بیوکیں لشکرکشیاں مدام لس مردم سکاسانمند بنت ءُ مردم وتی گسانی تہ ءَ بندیگ بنت۔ اے میان ءَ باز مردم زور بیگواہ کنگ بیت، مردمانی گس سوچگ بنت۔ بلے درسیں وھداں میان استمانی ءُ ھندی رسانکدر داں مردمانی کر ءَ سر بوگ ءَ دارگ بیت۔ چوش کہ میان استمانی مردمی ھک ، میان استمانی رسانکدر ءِ راھبندانی تچکی ءَ بگیری اِنت۔
جارکش ءَ گوشتگ کہ میان استمانی مردمی ھکانی ادارھاں ھوارمیان استمانی رسانکدر ءَ لوٹ ایت کہ آ اے وڑیں جیڑھانی بارو ءَ ریاست ءَ لاچار بہ کنت دانکہ ریاست اے وڑیں سانمندیں ھنداں روگ ءَ کمک بہ کنت ءُمردمی ھکانی بگیری ءَ رپورٹ کنگ بہ بیت۔
