جنیوا ، 11 مارچ، 2024 ءَ بلوچ راجی زْرمبشت ( بی این ایم ) ماں جنیوا ءَ راجانی سنت ءِ مردمی اگبالانی پتر ءِ 55 ویں نیاد ءِ میان ءَ تھر پہ تھریں مراگشانی دْرچے ءِ پارست ءَ بلوچستان ءِ سیاسی ءُ مردمی اگبالانی جھد ءَ سھرا کنت۔
دومی روچ ، 12 مارچ ءَ دو روچی پوسٹرانی نمائش ءُ آگاھی باوست بنا بیت ، پجیگ ءَ ماں جنیوا ءِ نامی ئیں جاہ ’ بروکن چیئر‘ ءَ زھرشانی ھم بیت۔اے مراگش ءِ من بلوچ راج ءِ جیڑھانی سر ءَ گپ جنگ ءُ پہ آیانی مول ءَ میان استمانی پلہ مرزی گرگ اِنت۔
13 مارچ ءَ آگاھی باوست ءُ اکسانی نمائش ءِ دومی روچ ءَ ، تچکے ءَ ماں چاگردی رسانکدر ءِ پارست ءَ مراگش شکسایگ بیت ءُ گوں رسانکدر ءِ جھگیراں گپ ءُ تْران بیت۔ دو روچی باوست بیگاہ ءِ چار ءَ آسر بیت ، ایشی ءِ تہ ءَ بلوچستان ءِ جاورانی سر ءَ آگاھی ودی کنگ ءِ کوشستانی بارہ ءَ سھی کنگ بیت۔
چہ ایشاں ابید بلوچ راجی زْرمبشت ( بی این ایم ) ءِ جھگیر مردمی اگبالانی پتر ءَ بلوچ راج ءِ جیڑہ ءَ ایر کن اَنت ءُ ھمے رد ءَ گپ ءُ تْرانانی تہ ءَ گیش ءَ گیش بھر زیر اَنت۔اے گپ ءُ تْرانانی من بلوچ راج ءِ جیڑھانی نیمگ دلگوش ءِ پرینگ ءُ میان استمانی تک ءَ آیانی اگبالانی درانگازی کنگ اِنت۔
پہ راجانی سنت ءِ مردمی اگبالانی پتر ءِ 55 می نیاد ءَ ماں جنیوا ءَ چہ سرجمیں جھان ءَ بی این ایم ءِ باسکانی مچی، بلوچستان ءِ جھد ءِ سھرا کنگ ءِ ھل ءُ مسام ءَ سرسبزین ایت۔اے دم ءُ درگت ءَ بی این ایم بلوچ راج ءِ سیاسی ءُ مردمی اگبالانی جیڑھانی نیمگ ءَ میان استمان ءِ دلگوش ءَ پرین ایت۔
