کراچی : میمن گوٹ ملیر ءِ میتگ داسیرو پڑ ( اولڈ تانا ) ءِ نزیک ءَ مردمے تیر گواری کنگ ءُ کشگ بیتگ۔ بنشون ءِ رد ءَ کشگ بیتگیں مردم ءِ نام ’ایوب سربازی ‘ اِنت کہ پہ گْوشگ ایران ءِ بگیری ءَ سلاھبندیں گل ’جنداللہ ‘ ءِ بنکی سروکان اَت۔
کمکی گل ، چیپا ءِ رد ءَ یک شمبے ، 25 پروری ءَ شپ ءِ ھپت ءُ نیم ءَ داسیرو پڑ ، میمن گوٹ ءِ نزیک ءَ مردمے تیر جنگ ءُ کشگ بیتگ۔
کشگ بیتگیں مردم ءِ کنٹ گوں چیپا ءِ ایمبولینس ءَ جناہ نادْراھجاہ ءَ برگ بیتگ۔
چیپا ءِ رد ءَ کشگ بیتگیں مردم چل ءُ پنچ سالی ئیں ’آدینگ ء داد مھمد ‘ ءِ نام ءَ پجارگ بیتگ۔
زانگ بہ بیت ، ھمے مردم ءِ بارہ ءَ کہ چیپا ءَ ’ آدینگ‘ ءِ نام ءَ پجار کرتگ گْوشگ بیگ ءَ اِنت ’ ایوب سربازی ‘ اِنت کہ ایران ءِ سرکار ءِ بگیری ءَ سلاھبندیں گل ’جنداللہ ‘ ءِ بنکی باسکاں یکے اَت۔
