شال: پہ زور بیگواھیں مردمانی پد جنگ ءَ شدکشیں زھرشانی گدان ءَ 5362 روچ سرجم بوتگ۔ دوشمبے ءِ روچ ءَ چہ تربت ءَ زور بیگواھیں مردمانی کھول زھرشانی گدان ءَ آتکگ اَنت، نیشنل پارٹی ءِ سروک ھاجی نیاز، الی مھمد ءُ آدگہ مردم پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ سروک ماما کدیر گوں مردماں تران کرتگ ءُ گوشتگ کہ بلوچ شھیدانی دیمونیاں مردم سرپد کرتگ اَنت۔ چہ زھرشانی ءُ میان استمان ءِ سپارتکاری ءِ سوب ءَ بلوچ زرمبشت نوں گوچن ءَ منگ بوتگ۔ اے درگت ءَ درساں وتی کردار پیلو کنگ لوٹ ایت۔
آئی ءَ گوشتگ کہ پاکستانی لشکر ءِ سروکی ءَ ریاست ءِ درسیں مشینری بلوچ چکچینی ءَ کارمرز بوگ اَنت ءُ بلوچ کارکن نشانگ کنگ ءُ زور بیگواہ کنگ بوگ ءَ اَنت۔ پہ ریاست ءِ زوراکیانی دارگ ءَبلوچاں یکجاہ بوگی اِنتءُ پہ میان استمان ِ دلگوش گور کنگ ءَ جھد کنگی اِنت۔
ماما کدیر گوشتگ کہ مارا انچوش گمان بوگ ءَ اِنت آھوکیں روچاں ریاست وتی زوراکیاں تیز کنت، ریاست ءَ بلوچستان ءَ یک ھونیگیں لشکرکشی یے بندات کرتگ، اے میان ءَ بولان ءُ مکران ءَ لشکر کشی بوگ ءَ اِنت۔ بولان ءَ لشکرکشی ءَ زھگ ءُ جنینانی زوریں بیگواھی ءِ ھال اِنت۔ مکران دشت ءِ کوھاں پاکستانی لشکر لشکرکشی کنگ ءَ گندگ بوتگ۔
