![](https://zrumbesh.com/wp-content/uploads/2024/02/Zrumbesh_24-01-13_18-23-18-364.png)
بلوچ وومن پورم ءِ جارکش ءَ گوشتگ کہ ھمّک راج گوں وتی جِتائیں دود آں چہ پجارگ بیت کہ آ دود یک راج ءِ کرنانی راجدپتر ءِ گواھیءَ دینت ، ایش دودانی جِتا جِتا بھر بنت ءُ ھمک بھر ءِ وتی ارزشت ءِ ھست، انچوش بازیں دود ھست اَنت کہ راجی نپءُ سیتانی بنیاد ءَ وھد ءِ گوما مٹ ھم بوت کن اَنت.
آئی ءَ گوشتگ کہ زبان دود ءِ ھما بھر اِنت کہ دود ءُ ربیدگ ءِ دومی بھرانی مانزمان اِنت، زبان دود ءُ ربیدگ ءِ درشان ءِ نام اِنت، دنیا ءِ تہ ءَ ھما راجاں وتا زندگ داشت کُتگ کہ وتی ماتی زبان رکینت کُتگ ءُ جھان ءِ تہ ءَ منارینت. مروچی بنگلادیش ءِ آجوئی ءِ زرمبشت ءَ بگر تاں تامل مومنٹ بندات بہ بیت ایشانی بُن ھشت ھم گوں زبان ءِ گار بیگواہ کنگ ءَ بندوک اِنت ،اے ھما راج اَنت کہ ایشاں سما بوتگ کہ زبان راجی پجار اِنت کہ رکینگی اِنت ،اگاں زُبان نامانیت گڈا راجانی زندگ بوگ بلکیں گران نہ بیت ناممکن بیت چیا کہ ابید چہ راجی زُبان ءَ راج ءِ بستار چوں یک گونگیں انسانےءَ بیت۔ھمے سوب اِنت کہ راجی پُسّگ وتی زبان ءِ رکینگ ءُ دیمروی ءَ وتی ساہ ءَ ھم ندر کنگ ءَ ساڑی اَنت ۔
آئی ءَ گوشتگ کہ بلوچ راج ھم بازیں ماتی زبانانی واھُند اِنت ءُ ھمک زبان ءِ وتی ارزشت ءُ بستارے ھست ،ماں گوست ءِ تہ ءَ گند ایں کہ نوری نسیر ھان ءَ بگر تاں 1948 ءَ بلوچی زبان ءِ بلاھیں راجدپتری ارزشت ءِ گندگ ءَ کئیت، بلوچی زبان ءِ ارزشت اد ءَ گوں نوری نسیر ھان ءِ ایش گپ ءَ پدر بیت کہ بلوچستان ءِ ھند گوں بلوچی زبان ءِ گپ کنگ ءَ بندوک اَنت کہ کُجا کُجا بلوچی زبان ھبر کنگ بیت ھما ھند بلوچستان ءِ بھر زانگ بیت،بلوچی زبان ءِ ارزشت اِنت کہ بلوچ ءِ دیم ءَ گریٹر بلوچستان ءِ نزریہ دیم ءَ آرگ بوتگ ۔
آئی ءَ گوشتگ کہ مروچی دنیا ایش گپ ءَ پھمیت کہ ماتی زبان ءِ چُک ءِ دماگی ردوم ءِ تہ ءَ بلاھیں کردے ھست، ھمے سوب اِنت کہ 21 پروری 1958ءَ بنگالی ورنا وتی زبان ءِ ارزشت ءَ دیم ءَ آرگ ءَ زھرشانی کُت ءُ وتی جان ندر کُت اَنت ۔آ ورنایاں زانتگ اَت کہ ایش ملکے تہ ءَ بنگالی زبان ءِ دنزانی تہ ءَ گار کنگ ءِ مول ءُ مراد بنگالی راج ءِ ھم ھاکانی تہ ءَ گار کنگ اِنت۔
آئی ءَ گوشتگ کہ ھمیش روچے برورد اِنت کہ بلوچ ھم دومی راجانی وڑ ءَ اے راستی ءَ زانت ءُ بلوچ راج وتی بازیں زبانانی سوب ءَ وڑ وڑیں پندلانی آماچ کنگ بیت ءُ بھر ءُ بانگ کنگ ءِ جهد کنگ بیت بلے بلوچ راج ءِ ورنا ھمک وھد ءَ پندلانی دیم ءَ اوشتاتگ اَنت ءُ ادارہ نہ بوگ ءِ ابید ھم وتی زبان ءِ سرا کار کتگ ءُ وتی زبان رکینتگ ۔ مروچی مارا شمارا پوه بوگی اِنت کہ بلوچ ءِ ھمک ماتی زبان مۓ وتی شھدیں زبان اِنت ءُ ھمک بلوچ ءِ زمہ واری اِنت کہ وتی ماتی زبان ءِ سرا کار بہ کنت چیا کہ ھما بلوچاں وتی زبان زندگ داشتگ مروچی دنیا ءِ کجام ھم ھند ءَ بیت بلوچ زانگ بیت بلے ھما بلوچ کہ بلوچستان ءِ تہ ءَ اِنت ءُ وتی زبان ءِ بیھال کتگ ھمُک جاہ ءَ وتی بلوچ بوگ ءِ باور کنائینگ کپیت ئے۔
آئی ءَ گوشتگ کہ بلوچ زالبول ءِ کرد زُبان ءِ دارگ ءِ تہ ءَ پراموش کنگ نہ بیت چیا کہ ھمے زالبول اَنت کہ زبان ءَ تاں آؤکیں پدریچ ءَ بران اِنت ،لوگ ءِ تہ ءَ ماتی زبان ءِ کارمرز کنگ ءَ بگر تاں لیلو ،گیدی کِسھانی آرگ زبان ءِ رکینگ ءِ ھما بھر اَنت کہ نسل داں نسل دیم ءَ سر کنگی اَنت ، سپت بیت یا کہ چوگان ایشانی ھما اسل دروشم ءَ رکینگ ءُ دیما برگ بلوچی زبان ءِ رکینگ ءِ مستریں بھر اَنت۔ چُش نہ اِنت کہ بلوچ زالبول ءَ لبزانکی رنگ ءَ وتی بھر نداتگ بانک کریمہ ءِ ھمرائی ءَ بازیں زالبولاں آزمانک ءُ شئیر لکتگ بلے ایش کساس سک کم اَنت ۔
آئی ءَ گوشتگ کہ بلوچ زالبول نوں وتی کرد ءَ گیش درشان بہ کنت ءُ لبزانکی رنگ ءَ دیم ءَ بیت ءُ زبان ءِ رکینگ ءَ وتی پرزا ءَ گیش شریں رنگے ءَ پیلو بہ کنت۔