بلوچ اسٹوڈنٹس پرنٹ ءِ بنجاھی جارکش ءَ وتی شنگ کرتگیں درشانی ءَ گوشتگ کہ مرچی پنجاپ زانشتجاہ ءَیک ناشریں گلے اسلامی جمئیت تلبہ ءَ پنجاپ زانشتجاہ ءَ بلوچ ءُ پشتون نودربرانی سر ءَ اُرش کرتگ ءُ سائنس وانشتجاہ ءَ ناشرکار بازیں کچے ءَ پترتگ اَنت ءُ زانشتجاہ ءِ نودربراں ءَ گیش لَٹ شاپ کرتگ چہ ایشی ءَ بازیں نودربرے زدگ ءُ دزگیر کنگ بیتگ۔
جارکش ءَ وتی درشانی ءَ گوشتگ کہ مرچی جمئیت ءِ ناشرکاراں پولیس ءِ ساڑی بیگ ءَ اَبید بلوچ ءُ پشتون نودربرانی سر ءَ اُرش ءُ تیرگواری کرتگ۔
گیش لٹ شاپ کرتگ اَنت بازیں نودربرے زدگ کرتگ ءُ جستگ اَنت۔
چہ جمئیت ءِ ناشرکارانی تچگ ءَ پد پولیس ءَ بلوچ ءُ پشتون نودربر لَٹ شاپ کرتگ اَنت ءُ چہ وابجاہ ءَ جتاھیں جاھاں نودربر دزگیر کرتگ۔ جارکش ءَ وتی ھیال درشان کرتگ اَنت ءُ گوشتگ کہ نودربر مئے راجی دیمروئی ءِ مانزمان اَنت۔ لاھور پولیس ءِ زانشتجاہ ءَ ساڑی بیگ ءَ اَبید جمئیت ءِ ناشرکاراں بلوچ ءُ پشتون نودربرانی سر ءَ بیڑ برتگ ءُ گیش ءَ چہ گیش لَٹ شاپ کنگ لاھور پولیس زانشتجاہ ءِ پھازداری ءِ نابودی ءَ پدر کنت۔
پولیس ءِ جمئیت ءِ ناشرکارانی دزگیر نہ کنگ ءَ اَبید بلوچ ءُ پشتون نودربرانی لَٹ شاپ کنگ ءُ آیاں ءَ چہ وابجاہ ءِ جتاھیں جاھاں دزگیر کنگ سک ءَ بژنی گپے ءُ در راجمستری کردے۔ آئی گوشتگ کہ پنجاپ ءَ بلوچ ءُ پشتون نودربرانی لَٹ شاپ کنگ سکیں بژنی گپے ءُ ایر جنگ ءِ کابل اِنت۔ یک نیمگے بلوچ ءُ پشتوناں رھبند ءُ کانود ءِ رد ءَ لوٹائین اَنت ءُ دومی نیمگ ءَ ھمک روچ آیانی پروپائلنگ کنگ بیت۔ آیاں ءَ گوں جتاھیں وڑاں ترسینگ بیت، اے یک جوڑ کرتگیں پندلے ءِ رد ءَ بلوچ ءُ پشتون نودربراں چہ وانگ ءَ زبھر کنگ ءَ اَنت۔
بی ایس ایپ ءِ جارکش ءَ وتی درشان ءِ گُڈی ءَ گوشتگ کہ انگت ءَ جمئیت ءِ ناشرکارانی بگیری ءَ پولیس ءِ نیمگ ءَ ھچ وڑیں کاروائی کنگ نہ بیتگ۔ ما اے وئیل ءَ گوں ترندی ءَ ایر جن ایں ءُ مئے لوٹ ھمیش اِنت کہ تیوگیں بلوچ ءُ پشتون دزگیر کرتگیں نودربر زوت یل کنگ بہ بنت۔
زانشتجاہ ءِ تہ ءَ جاورانی ناگیگ کنگ ءَ ناشریں جمئیت ءِ ناشرکارانی بگیری ءَ کانودی کاروائی کنگ بہ بیت۔
بنشون: درشان | اکس: مونوگرام
