کراچی: نامدرایں ملا ءُ کراچی ءِ الیوسپ اسلامک اکیڈمی ءِ سروک مولانا اَبدالسلام آرپ ءِ گون ءَ بلوچ یکجھتی کمیٹی ءَ یک دیوانے برجم داشتگ، دیوان ءَ بلوچ چکچینی ءُ زوریں بیگواھی ءِ درگت ءَ بلوچ ملایانی کرد ءُ آیانی سر ءَ اوست ءِ بارو ءَ گپ ءُ تران کنگ بوتگ۔
اے دیوان لیاری ءِ میتگ گریب شاہ ءَ دارگ بوتگ، ایشی ءِ سروکی بی وائی سی ءِ سروک لالا وھاب ءَ کرتگ۔ دیوان ءَ بی وائی سی گْوادر ءِ کارکن ابداللہ ءُ مردمی ھکانی کارکن زاھد بگٹی ھم ساڑی بوتگ اَنت۔
دیوان ءَ آیاں تران کرتگ ءُ گوشتگ کہ بلوچ دینی سروکانی زمہ واری بیت کہ آ ھمک جاہ ءَ بلوچ چکچینی ءِ بگیری ءَ توار چست بہ کن اَنت۔ آ پاکستان ءِ درسیں دینی وانگجاھاں اے زوراکیانی بگیری ءَ وتی کرد ءَ پیلو بہ کن اَنت ءُ آیاں ھمے سرپد بہ کن اَنت کہ بلوچستان ءَ مردمی ھک گنتریں وڑے ءَ پادمال کنگ بوگ ءَ اَنت ءُ مردمانی کشت ءُ کوش برجاہ اِنت۔
دیوان ءَ مردماں مولانا ابدالسلام آرپ ءِ کرد ساڑاتگ ءُ گوشتگ کہ مولانا اَبداسلام آرپ کراچی ءَ بلوچ چکچینی ءِ بگیری ءَ مھکمیں توارے، ما دیم ءَ ھمے اوست ءَ دار ایں کہ آ چو مدامی وڑ ءَ مئے کاروان ءِ بھر بیت۔
اے دیوان ءَ لینانی روگ ءِ سوب ءَ دیوان ءِ تامربند ءُ اکس گرگ نہ بوتگ اَنت۔
