بلوچ اسٹوڈنٹس ایکشن کمیٹی ءِ جارکش ءَ ماں رسانکد ءَ وری شنگ کرتگیں درشانے ءَ گوشتگ کہ 21 استپان(پروری) ءَ ماتیں زبانانی میان استمانی روچ ءِ درگت ءَ ” گال اَنت کہ گپتار بنت، گپتار بنت کردار” ءِ سرھال ءَ سرجمیں ھنکیناں ھوار پسنی ءَ مراگش اڈ دیگ بیت۔ مبارک کازی بلوچ راج ءِ یک نمیرانیں کارستے کہ آئی ءِ جھد پہ بلوچ راج ءُ زبانءَ مدام راج دپتر ءَ مانیت ، آئی ءَ ستا پیش کنان ءَ میان استمانی ماتیں زبانانی روچ ءَ مبارک کازی ءِ نام ءَ ندر کن ایں ءُ گل ءِ سرجمیں ھنکینانی نیمگ ءَ مراگش اڈ دیگ بیت۔ مستریں مراگش مبارک کازی ءِ ھند پسنی ءَ برجم دارگ بیت کہ آئی ءِ تہ ءَ مبارک کازی ءِ زند ءَ ھوار جتا جتائیں لبزانک ءُ زبان ءِ سر ءَ بھر ھوار اَنت۔ دومی ایدگہ کُلیں ھنکیناں مراگش اڈ دیگ بیت ءُ زبان ءُ زبان ءَ گوں بندوکیں سرھالانی سرءَ پینل ڈسکیشن، تران ءُ کسمانک ھوار بنت۔
آئی ءَ گوشتگ کہ اے روچ کہ چہ یونیسکو ءِ نیمگءَ ماتیں زبانانی رکینگ ءَ پہ نامینگ بوتگ ءُ سرجمیں دنیا ءَ ھمے بابت ءَ مراگش بیت ءُ زبانانی رکینگ ءُ جیڑھانی سرءَ توجیل سازگ بیت۔ بلوچ اسٹوڈنٹس ایکشن کمیٹی راجی نودربر گلے ءِ بستارءَ ھمک سال اے روچ ءَ برجم داریت داں بلوچ راج ءِ ماتیں زبانانی رکینگ ءُ آھانی جیڑھانی سر ءَ نوکیں توجیل دیم ءَ بیاریت۔ ادارہ ءِ پہ بلوچ راج ءِ ماتیں زباناں جھد مدام برجاہ اِنت کہ آئی ءِ تہ ءَ گل ءِ لٹریچر گام ءُ نوشت مستریں درور اَنت وتی ماتیں زبان بلوچی ءُ براہوئی زباناں چاپ ءُ شِنگ کنگ بیگ ءَ اَنت۔ ادارہ ءِ سِتک انت کہ یک راج ءِ داں زبان رکینگ ءُ دیمروئی دیگ مہ بیت آ راج گُنگ ءِ ھساب ءَ بیت ءُ آئی ءِ راج دوستی نیم شلونگ بیت۔ پمیشکا زبانانی رکینگ راجدوستی ءِ بنیاتی بھراں یکے ءُ اے ھوالہ ءَ جھد کنگ مئے بنیادی کاراں ھوار اِنت۔
جارکش ءَ گوشتگ کہ 21 استپان ماتیں زبانانی میان استمانی روچ ءَ مبارک کازی ءِ نام ءَ پسنی ءَ مزنیں مراگاھے ءُ ایدگہ کُلیں ھنکیناں مراگش اڈ دیگ بیت۔ ماتیں زبانانی میان استمانی روچ ءَ مراگش اڈ دیگ ءَ ھوار میان استمانی ماتیں زبانانی روچ ءُ بلوچی زبان ءِ سر ءَ نبشتگیں یک پٹ ءُ پولی کِتابکے ھم ھمے روچ ءَ چاپ ءُ شِنگ کنگ بیت اِنت۔ اے روچ ءِ بابت ءَ کتابک شنگ کنگ ءَ ھوار زبان ءِ سرءَ ڈاکومنٹری یے ہم پیش کنگ بیت اِنت۔
