اوگانستان ءِ راجی پھزگ ءِ کارگس ءِ رِد ءَ ماں بیست ءُ چار اداراں ءَ اوگان راجی لشکر ءِ تْرُندیں جنگی اُرشانی آسر ءَ 175 تالبان کُشگ بیتگ۔ اوگان راجی پھزگ ءَ وتی ھمروچی ئیں ٹیوٹر جاراں گْوشتگ کہ گْوستگیں بیست ءُ چار اداراں ءَ اوگان بُرزی لشکر ءِ بالیگرابانی بمباری ءِ کُمک ءِ آسر ءَ جھلی لشکر ءَ وتی جنگی اُرشاں 175 تالبان جنگول کُشتگ ءُ 84 َ ٹپی کرتگ۔ وتی ٹیوٹر کلوھاں راجی پھزگ ءِ کارگس ءَ گیشتریں سرپدی دیان ءَ گْوشتگ کہ اوگان راجی لشکر ءَ اِے اُرش ولایت نگرھار، پکتیکا، لوگر، گزنی، کندھار، ھرات، بلگ، جوزجان، سمنگان، سارئےپول، ھِلمند، بدکشان، کندوز ءُ بلگان ءَ کُرتگ اَنت۔
یات بہ بیت کہ چہ ایشی ءَ پیشی روچ ءَ اوگان راجی لشکر ءِ تْرُندیں جنگی اُرشانی سوب ءَ 262 تالبان کُشگ ءُ 172 ٹپی بیتگ ءُ ھمے جنگی اُرش ولایت نگرھار، نوریستان، کُنر، گزنی، ھیرات، پکتیا، بلگ، جوزجان، ھِلمند، کندوز ءُ کپسہ ءِ ولایتاں کنگ بیتگ اَنت۔
دومی نیمگ ءَ امریکی راجی پھزگ ءِ کُمکّار واجہ لیوڈ آسٹن وتی جارے ءَ گْوشتگ کہ اوگان راجی لشکر ءَ جنگی بودی ھست کہ چہ تالبان ناشرکاریں جنگولاں وتی دزگیر کُرتگیں دمگاں آجو بہ کنائین اَنت ءُ اے درگت ءَ ما یکشل ءَ اوگان راجی لشکر ءَ جنگی کُمک کنگ ءَ ایں بلے بَے ایش اِنت کہ پیسر اوگان راجی لشکر تالبان ءِ دیم ءَ جُنزگ ءَ میل اَنت۔
باید اِنت پیسر اوگان راجی لشکر گوں بالیگرابانی اُرش ءَ اوگان تالبان ءِ جنگی تب ءَ پْروش بہ دے اِنت پد ءَ اوگان راجی لشکر بالی ءُ جھلی جنگی اُرشاں کنان ءَ وتی دزگیر کُرتگیں دمگاں چہ اوگان تالبان ءَ آجو بہ کنت۔
بنشون: مانیٹرنگ ڈسک | اکس : دامگ
