سبی: زورگریں پاکستانی لشکر ءُ چیریں ادارھانی کارمنداں چار روچ پیش دو مردم آوار جتگ ءُ بیگواہ کرتگ۔
زور بیگواہ کنگ بوتگیں مردمانی نام کادم ھسین ء مزار ھان مری ءُ پیز مھمد ء جلاؤ مری اِنت کہ جھالڑی سبی ءِ جھمنند اَنت۔ 6 پروری 2024 ءَ پاکستانی لشکر ءُ چیریں ادارھانی کارمنداں چہ ٹیپل ءَ ھما وھد ءَ آوار جتگ اَنت کہ آ سپرے ءَ بوتگ اَنت۔
زور بیگواھیں کادم ھسین ءِ بارو ءَ گوشگ بیت کہ آئی پت مزار ھان مری ءَ گوستگیں چاردہ سال بیت کہ بیگواہ اِنت۔
بنشون ءِ رد ءَ ھاجی مزار ھان ء گھرام 28 مئی 2010 ءَ گوں دگہ چار مردمانی ھمراھی ءَ بیگواہ کنگ بوتگ۔
مزار ھان ءِ کھول ءِ گوشگ اِنت کہ سبی ءِ ھند جالڑی ءَ لشکرکشی ءِ میان ءَ پاکستانی لشکر ءَ مزار ھان ءَ ھوار پنچ مردم آوار جتگ ءُ بیگواہ کرتگ۔
زور بیگواھیں مزار ھان ءِ کھول پہ آئی آجوئی ءَ توار چست کنگ ءَ بوتگ کہ پاکستانی لشکر ءَ آئی زھگ زور بیگواہ کرتگ۔
