گزہ: چہ پلستین ءِ ھند گزہ ءَ ھماس ءِ جنگولاں اسرائیل ءِ سر ءَ اُرشانی وھد ءَ اسرائیل ءِ لشکر ءِ میجرے ءَ ھوار پنجاہ لشکری کارمند ءُ شھری دزگیر کرتگ اَنت۔
جھانی رسانکدر ءِ رد ءَ مرچی سھب ءَ ھماس ءَ چہ گزہ ءَ اسرائیل ءِ سر ءَ اچ دریا ءُ برزا اُرش کرتگ، اُرش ءِ آسر ءَ سیھونی لشکریاں ھوار چل اسرائیلی کشتگ ءُ 700 ءَ گیش ٹپی کرتگ چہ آیاں درزنانی کچ ءَ مردمانی جاور ناگیگ اَنت۔
رسانکدر ءَ شنگ بیتگیں تامربنداں گندگ بیت کہ ھماس ءِ جنگولاں بازیں لشکری ءُ شھری دزگیر کرتگ اَنت۔
اسرائیلی رسانکدر ءَ اے گپ راست کرتگ کہ ھماس ءِ جنگولاں اُرشانی میان ءَ پنجاہ ءَ گیش اسرائیلی لشکر ءِ کارمند ءُ شھری دزگیر کرتگ ءُ گوں وت برتگ اَنت۔
دومی نیمگ ءَ ارب رسانکدر ءِ گوشگ اِنت کہ ھماس ءِ جنگولاں اسرائیلی لشکر ءِ میجر نمرود الونی دزگیر کرتگ ءُ گوں وت برتگ۔
بنشنو: جھانی رسانکدر / اکس: دامگ
