ایتھنز: یونان ءِ دریا ءَ لانچے ءِ بڈگ ءَ پنچ سد ءَ گیش مردمانی مرگ ءِ گُمان اِنت، ھپتاد ءُ ھشت مردم ءِ جون کشگ بیتگ۔ جھانی رسانکدر ءِ رد ءَ بڈ اتگیں لانچ چہ لیبْیا ءَ دیم پہ اٹلی ءَ روگ ءَ بیتگ کہ یونان ءِ دریا ءَ بڈ اِتگ۔
پہ مردمانی کشگ ءَ کمک برجاہ اِنت، داں اے وھد ءَ ھپتاد ءُ ھشت مردم ءِ جون ءُ یکسد ءُ چار مردم زندگ ءَ کشگ بیتگ اَنت۔ یونانی لشکر ءَ پہ مردمانی درکانودی برگ ءِ بھتام ءَ نوہ مسری شھری دزگیر کرتگ۔
زندگ ءَ کشگ بیتگیں مردمانی گوشگ اِنت کہ مرتگیں مردمانی کچ پنچ سد ءَ گیش بیت، مرتگیں مردمانی تہ ءَ درزنانی کچ ءَ پاکستانی ھوار اَنت۔
یورپی سرکار ءَ اے وئیل روم ءِ دریا ءِ گوستانک ءِ تہ ءَ مستریں وئیل لیک اِتگ ءُ گوشتگ کہ بڈ اِتگیں لانچ ءَ پنچ سد ءَ داں ھپت سد ءِ کچ ءَ مردم سوار بیتگ اَنت۔
پہ بڈ اتگیں مردمانی کشگ ءَ لشکری جھاز، جنگی بالگرد ءُ شش یکدار کمک کنگ ءَ اِنت۔ یکسد ءُ چار مردم زندگ ءَ کشگ بیتگ ءُ ھپتاد ءُ ھشت مردمانی جون دزکپتگ اَنت۔
پہ آدگرانی کشگ ءَ کار برجاہ اِنت۔ بڈ اتگیں لانچ ءَ پاکستان، شام، مسر ءَ ھوار آدگہ بازیں ڈیھانی باھوٹی گوں بیتگ اَنت۔ آیانی 310 پاکستانی بیتگ اَنت، آیانی تہ ءَ 298 مردمانی مرگ ءِ گُمان اِنت۔
یونان ءَ پاکستان ءِ سپارتجاہ ءَ دوازدہ پاکستانیانی کشگ ءِ گپ راست کرتگ۔
بنشون: جھانی رسانکدر | اکس: دامگ
