بلوچ کونسل پنجاپ زانشتجاہ ءِ جارکش ءَ وتی شنگ کرتگیں درشان ءَ گوشتگ کہ ماؤنٹین اینڈ ریسرچ ڈیپارٹمنٹ ءِ ڈائریکٹر منور سابر ءِ نیمگ ءَ بلوچ نودربرانی لٹ شاپ کنگ ءَ گوں ترندیں دانکاں ایر جن ایں۔
بلوچ نودربرانی بگیری ءَ یک مھکمیں شوربندی یے ءِ رد ءَ آ پنجاپ زانشتجاہ ءَ مدام ترسینگ بیگ ءَ اَنت۔ پہ آیانی دارگ ءَ کوھنیں وڑ ءُ پیماں چکاسگ ءُ مارا زھنی نادراھی ءِ آماچ کنگ ءَ اَنت۔
آئی ءَ گوشتگ کہ پنجاپ زانشتجاہ ءَ چہ گْوستگیں چنچو سالاں جتائیں زوراکی چکاسگ بیگ ءَ اَنت۔ برے کلرکانی نیمگ ءَ بلوچ نودربرانی بگیری ءَ زْرمشت کشگ بیت، برے ڈیپارٹمنٹ ءَ زانشجاہ ءِ پیکلٹی ءِ نیمگ ءَ تیوک ءَ پہ بلوچ بیگ ءِ بنیات ءَ مدام زوراکیانی آماچ کنگ بنت۔
لھتیں روچاں پیش زانشتجاہ ءِ کلرکانی نیمگ ءَ پھازدارانی ساڑی بیگ ءَ نہ تیوک ءَ بلوچ نودربر جتگ اَنت، بلکیں چہ ایشی ءَ پد نودربر سسپنڈ کنگ بیتگ اَنت۔
جارکش ءَ گوشتگ کہ نہ تیوک ءَ پنجاپ زانشتجاہ ءَ بلکیں توگیں ڈیھ ءُ پنجاپ ءَ کُج ءَ کہ بلوچ نودربر وانگ ءَ اَنت، پہ آیاں واکدار ءُ ادارھانی نیمگ ءَ دارگ ءِ روشت ءَ ھما کوھنین اَنت۔ ما چہ کوھنیں شوربندیاں دلسْیاہ بیتگ ایں۔ مئے گوں درسیں مردم دوستیں ادارھاں ءُ دیمروئی دوستیں بھرگانی گوں ءَ دزبندی اِنت کہ اے وھد ءَ مئے گوں ءَ کمک بہ کن اَنت ءُ مئے توار جوڑ بہ بنت۔ دانکہ زانشتجاہ ءَ واکدارانی نیمگ ءَ ایشانی بگیری ءَ گامگیج زورگ نہ بیتگ، ما وتی زھرشانیانی درچ ءَ برجاہ داریں۔
بنشون: درشان |اکس: رسانکدر
