گوادر: پاکستانی لشکر ءِ دست ءَ زور بیگواہ کنگ بوتگیں لالا رپیک ءُ بالاچ ءِ کھول ءَ زھرشانی ءَ سربندن ءِ دوراھی ءَ سی پیک دگ بند کرتگ ءُ نشتگ اَنت۔
آدینگ ءِ روچ ءَ چہ گْوادر ءِ شھر ءَ زور بیگواھیں مردمانی کھول ءِ نیمگ ءَ درکپتگیں زھرشانی روانک ءَ سیاسی ءُ چاگردی کارکنانی ھواری ءَ جنین ءُ زھگاں بازیں کچے ءَ بھر زرتگ۔
زھرشانی کنوکیں مردماں زوریں بیگواھی ءِ بگیری ءَ اوگام جتگ ءُ وتی زور بیگواھیں مردمانی آجوئی ءِ لوٹ کرتگ۔ پہ زھرشانی روانک ءِ دارگ ءَ پولیس کارمند بازیں کچے ءَ آتکگ انت زھرشانی کنوکانی ترسینگ ءِ جھد کرتگ۔
زھرشانی کنوکیں مردمانی گوشگ اِنت دانکہ مئے مردم یل کنگ نہ بوتگ اَنت ما وتی زھرشانی ءَ نندانک ءَ برجاہ دار ایں۔
آیاں گوشتگ کہ مئے زور بیگواھیں مردمانی سر ءَ چونیں بھتامے ھست گڑا آمیدگس ءَ پیش کنگ بہ بنت، اگاں بے میار اَنت گڑا زوت یل کنگ بہ بنت۔
یات بہ بہ اِت کہ اے وھد ءَ تربت ءُ سامی ءَ دو جاہ ءَ زور بیگواھیں مردمانی کھولانی نیمگ ءَ زھرشانی نندانک برجاہ اَنت۔
