بلوچ نیشنل موومنٹ ءِ انسانی ھکانی ادارہ پانک ءَ 28 اپریل 2026 ءَ تمپ ءِ میتگ کونشکلات ءَ ریاستی کشندہ ٹولی ءِ تیرگواری ءَ امیر نور ءِ کوش ءِ سرءَ بژن درشان کرتگ ءُ گوشتگ کہ کشندہ ٹولی ءَاے کھول ءِ سر ءَ ھما وھد ءَ تیرگواری کرتگ کہ آ پہ تربت شھر ءَ روگ ءَ دگ ءِ سر ءَ ودار کنگ ءَ بوتگ اَنت۔
آئیءَ گوشتگ کہ اے تیرگواری ءِ آسر ءَ امیر نور ء نوربکش جاھی بیران بوتگ، آئی لوگبانک بی بی کائنات ءَ باز تیر لگ اتگ آ نادراھجاہ ءَالاج بوگ ءَ اِنت۔ آئی گھار نجمہ ءُ آئی کسان سالیں بچک ریان ھم ھمے ارش ءَ ٹپی بوتگ اَنت ءُ اے وھد ءَ آیانی الاج بوگ ءَ اِنت۔
پانکءَ گوشتگ کہ اے دلپدریں ویل ءَ پد ءَ یک ھندی زالبولے گرکول بی بی پہ سانمندیں کھول ءِ کمک ءَ آھگ ءَ بوتگ کہ آئی ءَ دل ءَ گپتگءُ بیران بوتگ۔ اے زوراکی یک مزنیں درانسانی کارے۔
آئی ءَ گوشتگ کہ امیر نور چہ ایشیءَ پیش 4 نومبر 2024ءَ زور بیگواہ کنگ بوتگءُ پد ءَ یل کنگ بوتگ۔ اے ارش انسانی ھکانی لگتمالی اِنت۔ اے ویل ءِ بابت ءَ دلجمیں رنگے ءَ پٹ ءُ پول کنگ بہ بیت۔
پانک ءَ لوٹ کرتگ ءُ گوشتگ کہ اے وڑیں انسانی ھکانی لگتمالی دارگ ءَ گامگیج زورگ بہ بیت، پہ شھریانی پھریزگ ءَ دلجمی دیگ بہ بیت ءُ بلوچستانءَ برجاھیں ناھکی گر ءُ دار کنگ بہ بنت۔
بنشون : درشان اکس: پانک
