بلوچ نیشنل موومنٹ ءَ وتی شنگ کرتگیں درشانے ءَ گوشتگ کہ بی این ایم ءِ میان استمانی مھم، پاکستان ءِ برجاھیں انسانی ھکانی لگتمالی ءِ میارباری، بلوچ بگیریں پالیسی ءُ زور گپتیں بلوچستان ءَ بلوچ راج ءِ بگیری ءَ ناشریں مچی سزا ءِ پاشک کنگ ءِ درچ برجاہ اِنت۔
آئی ءَ گوشتگ کہ مرچی بی این ایم امریکہ چیپٹر ءَ مھلوک ءِ مچی ءَ پنتاک بھر ءُ بانگ کرتگ دانکہ مردماں سرپد بہ کن اَنت ءُ بلوچستان ءَ گوں مھلوک ءَ بیوکیں زوراکیانی بابت ءَ سرپدی بدے اَنت۔ بیست ءُ یکمی کرن ءَ اے ناھکی جمھوری جھان ءُ میان استمانی تک ءِ دیم ءَ بوگ ءَ اَنت، اے پاکستان ءِ درکانودی زورگپتی ءِ آسر اِنت۔
آئی ءَ گوشتگ کہ پاکستان بلوچ مرد ءُ زالبول دانشور، پروپیسر، وکیل، ڈاکٹر، استاد، انسانی ھکانی کارکن، دھکان، شپانک ءُ نودربرانی بگیری ءَ زوراکی کنگ ءَ اِنت۔ آیانی تہ ءَ کسان امر ءُ ھپت سالی زھگ ھوار اَنت، چہ اے زوراکیاں کس پھریز نہ اِنت۔ ھزارانی کچ ءَ مردم زوریں بیگواھی ءِ آماچ اِنت ءُ اے وھد ءَ پاکستانی پوج ءِ درکانودی بندیگجاہ ءَ بندیگ اَنت۔
آئی ءَ گوشتگ کہ بلوچ سیاسی کارکن ءُ اھوالکارانی کھول ھم پاکستان ءِ برجاھیں بلوچ بگیریں مچی سزا ءِ پالیسی ءَ نشانگ بوگ ءَ اَنت۔ بلوچستان یک انچیں دمگے پاکستان چہ وتی درکانودی زورگپتی ءَ جتائیں زوراکی کنگ ءَ اِنت۔
آئی گوشتگ کہ مرچی امریکہ ءَ بی این ایم ءِ باسکاں پنتانک بھر ءُ بانگ کرتگ دانکہ جھان ءِ یک مستریں جمھوریت ءِ مھلوک ءَ زورگپتیں بلوچستان ءِ مھلوک ءِ درد ءُ رنجانی بابت ءَ سرپد بہ کن اَنت۔ اے مھم ءِ مول زورگریں ریاست پاکستان ءِ راستیں دروشم ءَ پاشک بہ کن ایں کہ آ گوستگیں دو دھک ءَ گیش اِنت در انسانی زوراکی کنگ ءَ اِنت۔
بنشون: درشان اکس: بی این ایم
