بلوچ لبریشن آرمی ءِ جارکش جیئند بلوچ ءَ وتی درشان ءَ گوشتگ کہ سرمچاراں نوزدہ مارچ ءَ داں 28 مارچ ءَ واشک، ھاران، کلات، مستونگ، سوراب، ھزدار، شال، تُربَت ءُ بارکان ءَ چاردہ کاروائی کرتگ ءُ پوج ءِ ھژدہ کارمند کشتگ ءُ لھتیں ٹپی کرتگ، سرمچاراں چوکی دستیگ کرتگ کارمند دزگیر کرتگ اَنت ءُ آیانی سلاہ ءُ آدگہ جنگی سامان پل اِتگ اَنت۔ اے کاروائیاں گوں پوج ءَ جنگ ءَ بی ایل اے ءِ دو سرمچار شھید بوتگ۔
آئی گوشتگ کہ نوزدہ مارچ ءَ سرمچاراں واشک ءِ ھند تھسیل ءَ سی پیک دگ ءَ زورگریں پاکستانی پوج ءِ ٹوھیں بنجل ءِ سر ءَ گوں راکٹ ءُ آدگہ وتکاریں سلاھاں اُرش کرتگ ءُ دژمن جانی ءُ مالی تاوان داتگ۔ نزیک برجائیں لیویز چوکی دستیگ کرتگ ءُ کارمند دزگیر کرتگ اَنت۔ آیانی سلاہ پل اِتگ اَنت ءُ کارمند پد ءَ یل داتگ اَنت۔ ھمے روچ ءَ ھاران ءِ ھند برشونکی ءَ پاکستانی پوج ءُ چیریں ادارھانی جوڑ کرتگیں کشندہ ٹولی ءِ بندر ءِ سر ءَ اُرش کرتگ۔ ھاپز ممتاز ءِ سروکی ءَ کار کنوکیں سلاہ بندیں ٹولی ءِ کارمنداں جانی ءُ مالی تاوان بوتگ۔ میڑ ءَ سنگت ابداللہ بلوچ پنام ساربان شھید بوتگ۔ کلات ءِ ھند چپر ءَ سرمچاراں پاکستانی پوج ءِ پیادگیں کارمندانی سر ءَ اُرش کرتگ تاوان داتگ ءُ پدکنز کرتگ اَنت۔ مستونگ ءِ ھند گرگینہ، کلی پسند ھان ءَ سرمچاراں ھما وھد ءَ سنگر گپتگ ءُ پوج ءِ سر ءَ اُرش کرتگ کہ پوج ھمے ھند ءَ پہ زوراکی کنگ ءَ روگ ءَ بوتگ۔ زورگریں پوج ءِ دو گاڑی اُرش ءِ زد ءَ اتکگ، چہ ایشی ءَ دژمن ءِ سَے کارمند جاھی مرتگ ءُ باز ٹپی بوتگ۔ پوج ءَ ھمے وھد ءَ کواڈ کاپٹر ھم بال داتگ کہ چہ آیاں یکے سرمچاراں نشانگ کرتگ ءُ دور داتگ، میڑ ءُ سنگت درا ٹپی بوتگ۔
آئی گوشتگ کہ بیست مارچ ءَ سرمچاراں سوراب ءَ کسٹم ءِ چوکی دستیگ کرتگ کارمند دزگیر کرتگ اَنت ءُ آیانی سلاہ پل اِتگ اَنت۔ دیم ءَ آیوکیں پاکستانی پوج ءِ کاروان نشانگ کرتگ، جانی ءُ مالی تاوان داتگ۔ رند ءَ پوج ءِ لھتیں گاڑیانی کاروانے زھری ءِ ھند انجیرہ ءَ ھما وھد ءَ سنگر گپتگ ءُ نشانگ کرتگ کہ آ چہ سوراب ءَ روگ ءَ بوتگ۔ اے اُرش ءَ پوج ءِ ھشت کارمند مرتگ ءُ باز ٹپی بوتگ، لگوریں پوج ءَ وتی مرتگیں کارمندانی لاش یل داتگ اَنت ءُ تتکگ۔ ھمے روچ ءَ ھزدار ءِ ھند بلبل، زھری ءَ سرمچاراں پوج ءِ کاروان ءَ ھواریں یک ٹرکے گوں تراکناکیں شورھاں نشانگ کرتگ جانی ءُ مالی تاوان داتگ۔
جارکش ءَ گوشتگ کہ 21 مارچ ءَ سرمچاراں ائید ءِ روچ ءَ ھاران لجے ءَ ائیدگاہ ءَ شُتگ اَنت ءُ گوں مھلوک ءَ تران کرتگ۔ ھمے روچ ءَ سنگت یاکوب بلوچ پنام دُرا گرگینہ ءَ گوں پوج ءَ میڑ ءَ سکا ٹپی بوتگ اَت ءُ رند ءَ شھید بوتگ۔
آئی گوشتگ کہ 23 مارچ ءَ کلات ءِ ھند منگچر ءَ سرمچاراں پوج ءِ بمب چاروکیں ٹولی ءِ پیادگیں کارمند گوں تراکناکیں شورھاں نشانگ کرتگ۔ اُرش ءِ آسر ءَ سَے کارمند جاھی مرتگ۔ رند ءَ دیم ءَ آیوکیں پاکستانی پوج ءِ بکتر بند گاڑی گوں راکٹ ءُ آدگہ سلاھاں نشانگ کرتگ ءُ گیش تاوان داتگ۔
آئی گوشتگ کہ 26 مارچ ءَ سرمچاراں شال ءِ ھند ڈگاری ءَ زڑکو ءَ زورگریں پاکستانی پوج ءِ پیادگیں کارمند ھما وھد ءَ گوں تراکناکیں شورھاں نشانگ کرتگ اَنت کہ آ نوک جوڑ بیوکیں چوکی ءِ نیمگ ءَ روگ ءَ بوتگ اَنت۔ تراک ءِ آسر ءَ دو کارمند جاھی مرتگ ءُ یکے سکا ٹپی بوتگ۔
جارکش ءَ گوشتگ کہ 27 مارچ ءَ تُربَت ءِ ھند گنہ ءَ سرمچاراں پاکستانی پوج ءِ چوکی ءِ سر ءَ گرنیڈ لانچر ءِ باز گولا آس داتگ ءُ دژمنیں پوج جانی ءُ مالی تاوان داتگ۔
آئی گوشتگ کہ 28 مارچ ءَ سرمچاراں یکشمبے ءِ شپ ءَ بارکان ءِ ھند گیرپٹی ءَ برجائیں پاکستانی پوج ءِ چوکی ءِ سر ءَ اُرش کرتگ۔ چہ ایشی آسر ءَ زورگریں پوج ءِ یک کارمندے مرتگ ءُ دژمنیں پوج ءَ گیش جانی ءُ مالی تاوان بوتگ۔ ھمے روچ ءَ سوراب ءَ سرمچاراں شال کراچی شھدگ بستگ ءُ داں دیر ءَ پٹ ءُ پول کرتگ۔ ھمے میان ءَ آئی ایس آئی ءِ چریک پجارگ ءَ پد کشتگ۔ ھمے وڑ ءَ سوراب ءِ ھند گدر ءَ پاکستانی پوج ءِ کارمند ھما وھد ءَ گوں دستی بمب ءَ نشانگ کرتگ اَنت کہ آ یک پارم ھاؤسے ءَ سنگرے ءِ رنگ ءَ کارمرز کنگ ءَ آتکگ اَنت۔ تراک ءِ آسر ءَ دوئیں کارمند سکا ٹپی بوتگ اَنت۔
جارکش ءَ گوشتگ کہ دژمنیں پوج ءِ بگیری ءَ کاروائیاں گل ءِ دو دلیریں سرمچار پہ وتن ءَ کربان بوتگ اَنت۔ شھید ابداللہ رودینی بلوچ پنام ساربان ء نازر الی رودینی پَنجگُور ءِ ھند ھدابادان ءِ جھمنند اَت۔ بلوچستان یونیورسٹی ءَ بی ایس انگلش لٹریچر ھلاس کرتگ اَت۔ آ 21 مئی 2023 ءَ شھری چیرجنگی ءِ بستار ءَ بھر زرتگ ءُ جولائی 2025 ءَ کوہ ءَ شتگ۔ آ نوزدہ مارچ 2026 ءَ ھاران ءِ ھند لجے ءَ گوں دژمنیں پوج ءَ جنگ دیان ءَ شھید بوتگ۔ دومی شھیدیں سرمچار سنگت یاکوب بلوچ پنام درا ء گل شیر بلوچ، تُربَت دشت ءِ جھمنند اَت۔ آ 2024 ءَ گل ءَ ھوار بوتگ ءُ شور پارود، کلات ءُ مستونگ ءَ وتی زمہ واری پیلو کرتگ۔ آ 21 مارچ 2026 ءَ مستونگ ءِ ھند گرگینہ ءَ گوں زورگریں پاکستانی پوج ءَ جنگ ءَ ٹپی بوتگ ءُ رند ءَ آئی ٹپانی درد نہ سگ اِتگ ءُ شھید بوتگ۔
بنشون: درشان. اکس: زرمبش
