بلوچ لبریشن آرمی ( بی ایل اے ) ءِ جارکش جیھند بلوچ ءَ وتی درشان ءَ گوشتگ کہ 18 مارچ 2026 ءَ شال ءَ زورگر ءِ باڑھی کارمند، کشندہ ٹولی ءِ سروک ءُ بلوچ چکچینی ءِ مزنیں کمکار سرپراز مسوری ءِپریس کانپرنس کوھن ءُ بے سوبین ریاستی اسکرپٹ ءَ پیش دار ایت، ایشی پارست ءَ اے جنگی نپ وار زورگریں پوج ءِ شاباشی ءِ زورگ ءُ وتی نوکری ءِ پکا کنگ ءِ کوشست ءَ اِنت۔ بلوچ لبریشن آرمی تچک ءَ گوش ایت کہ اے زالبول ءَ پدائی جوڑ کنگ ءُ پیش دارگ ءَ اَنت، ایشی گوں مئے گل یا چونیں ھم لشکری کاروانے ءَ ھچ وڑیں نزیکی نیست۔
آئی ءَ گوشتگ کہ بلوچستان ءِ آجوئی زرمبشت ءَ زالبولانی ھواری یک انچیں راستی یے جوڑ بوتگ کہ ایشی ریاست ءِ بنیاد سرینتگ۔ زورگریں ریاست چہ اے زانشتی مھکمی ءَ انچوش ترس آماچ اِنت کہ آ نوں پہ بلوچ زالبولانی توار ءِ دارگ ءَ اے وڑیں کپتگیں کار ءَ کنگ ءَ اَنت۔ سرپراز مسوری ءِ وڑیں مردم، مدام دژمن ءِ وپاداریں کارمند بوتگ اَنت، مرچی بلوچ چادر ءُ چاردیوالیاں لگتمال کنگ ءُ یک کودکیں بلوچ گھارے رسانکدر ءِ دیم ءَ آرتگ ءُ وتی واجہ جرنیلاں وشاں کنگ ءَ اِنت۔
جارکش ءَ گوشتگ کہ اے راستی سرجمیں جھان ءِ دیم ءَ پدر اِنت کہ ریاستی ادارہ یکشل ءَ کودکیں شھریاں زور بیگواہ کنگ ءُ پد ءَ آیاں پریس کانپرنسانی رد ءَ کارگرگ ءَ اَنت، آیانی دروگ ھمک وھد ءَ پاشک بوگ ءَ اَنت۔ آیانی کِر ءَ نوں ھچ وڑیں نوکیں گپ یا شوربندی پشت نہ کپتگ۔ گوست ءَ ماھل بلوچ ءِ کیس ھمے راستی ءِ منانک اِنت، آ 17 پروری 2023 ءَ چہ شال ءَ زور بیگواہ کنگ ءَ پد ”وتکش تراک“ لیک اِتگ ءُ رسانکدر ءَ پیش کرتگ۔ درسیں ریاستی زوراکیاں ابید دژمن ءِ وتی ھم آمیدگس ءَ گڈی ءَ آ یل کناھینت۔ گوستانک شاید اِنت کہ وھدے زورگر بلوچستان ءَ سرمچارانی دست ءَ تاوان وارت، آ پہ بیرگیری لس شھری ءُ زالبولاں نشانگ کنت ءُ چیریں ادارھانی سوبمندی ءِ نام ءَ دنت۔ انوگیں کسمانک ھمے درچ ءِ یک بھرے دانکہ لس مھلوک ءِ دلگوش گوں ھیروپ آپریشن ءِ انوگیں گوستانکی سوبمندی ءُ زورگریں ریاست ءِ سرجم ءَ پوجی پروش ءَ دور بہ بیت۔
جیھند بلوچ ءَ وتی درشان ءِ گڈی ءَ گوشتگ کہ بی ایل اے تچک ءَ گوش ایت بلوچ راجی زرمبشت نوں ھما جاہ ءَ سر بوتگ کہ اود ءَ دژمن ءِ پندلاں وتی سان ھلاس کرتگ اَنت۔ ما پہ وتی سرڈگار ءِ دیمپانی ءُ سرجمیں آجوئی ءَ ارشاں گوں ترندی ءَ برجاہ دار ایں۔ زورگر ءِ کمکاراں گیرآرگی اِنت کہ بی ایل اے ءُ گوستانک ءِ آمیدگس آیاں الم جست ءَ کنت۔
بنشون: درشان اکس: زرمبش
