چہ ڈیرہ گازی ھان ءَ پاکستانی پوج ءِ دست ءَ زوربیگواھیں ھاکم مجید بلوچ ءِ گھار ھمیرا بلوچ ءَ وتی درشان ءَ گوشتگ کہ دو نومبر 2025 ءَ سی ٹی ڈی ءُ سادہ پوشاکیں مردماں ڈیرہ گازی ھان ءِ ھند ماڈل ٹاؤن ءَ مئے گس ءَ بیڑ برتگ ءُ منی براس ھاکم مجید بلوچ آوار جتگ ءُ بیگواہ کرتگ۔
آئی گوشتگ کہ ھاکم بلوچ یک وانندگ ءُ زانتکاریں ورنایے انوں آ پہ کھول ءِ والینگ ءَ دبئی ءَ شتگ ءُ وتی پس ءِ دکان ءَ کار کرتگ۔ آ چونیں ھم درکانودی کاراں ھوار نہ بوتگ۔ ھاکم بلوچ ءِ بے میار ءَ درکانودی بیگواہ کنگ تچک ءَ زوراکی یے۔
آئی گوشتگ کہ دو نومبر ءِ شپ ءَ وھدے کہ منی برات آوار جنگ بوتگ گڑا مارا یک سادہ پوشاکیں مردمے ءَ دلجمی داتگ کہ تئی براس ءَ جست ءُ پرس کن ایں ءُ پد ءَ نیم ادارے ءِ تہ ءَ یل کن ایں شما بے توار بہ بہ اِت۔ بلے بژن اِنت کہ چار ماہ ءِ گوزگ ءَ ابید ھم منی براس واتر نہ آتکگ ءُ ناکہ آئی بابت ءَ مارا سرپدی دیگ بوتگ۔
آئی گوشتگ کہ اے ویل ءَ پد ڈیرہ گازی ھان تانہ ءَ ایپ آئی آر نبشتہ کنگ ءَ شتگ ایں بلے آیاں نبشتہ نہ کرتگ۔چہ ایشی ءَ مئے ترس ءُ جنجال گیش بوتگ اَنت۔
ھمیرا بلوچ ءَ گوشتگ کہ چہ ایشی ءَ ھوار ما وتی براس ءِ آجوئی ءَ بازیں ادارہ ءُ سرکار ءِ کِر ءَ لوٹ کرتگ۔ بلے بد بھتی ءَ مئے توار کس ءَ گوش نہ داشتگ۔ ایشی جاہ ءَ پہ مئے بے توار کنگ ءَ بیھار دیگ بوتگ۔
آئی گوشتگ کہ ما گوں ڈیرہ گازی ھان ءِ ادارہ، سردار، سرکار، انسانی ھکانی گل، اھوالکار ءُ زانتکاریں مردماں لوٹ کن ایں کہ مئے توار جوڑ بہ بنت ءُ منی برات ھاکم مجید بلوچ ءِ آجوئی ءَ دلجمی بہ دئے اَنت۔
