بلوچ نیشنل موومنٹ (بی این ایم) ءَ چہ 10 مارچ ءَ داں 9 اپریل ءَ راجی آجوئی ءِ ھک ءُ بلوچستان ءَ برجاھیں مچی سزا، زوریں بیگواھی ءُ سیاسی کارکنانی درکانودی دزگیریانی بگیری ءَ داں یک ماھے ءَ میان استمانی تک ءَ مھمے ءِ جار پرینتگ۔
آئی ءَ گوشتگ کہ اے مھم ءِ میان ءَ دو میان استمانی کانپرنس، زھرشانی، یک روانکے ءُ اکوام متھدہ ءِ ھیومن رائٹس کونسل ءِ مراگشانی میان ءَ جنیوا ءَ سپارتی ءُ انسانی ھکانی تک ءَ جتائیں گامگیج زورگ بیت۔
آئی ءَ گوشتگ کہ اے سرگرمیانی رد ءَ بی این ایم میان استمانی تک، انسانی ھکانی گل ءُ پالیسی سازانی دلگوش ءَ گوں بلوچستان ءَ انسانی ھکانی جاوراں کنگ لوٹ ایت۔ بلوچستان ءَ سیاسی کارکن، نودربر ءُ سیول سوسائٹی ءِ کارکن یکشل ءَ دزگیر بوگ، آیانی کھولاں مچی سزا دیگ ءُ کانودی لوٹانی پیلو کنگ ءَ ابید آیاں داں دراجکشیں وھدے ءَ بندیگ کنگ ءَ اَنت۔
بی این ایم تچک ءَ گوش ایت کہ اے تباھی ءِ انساپ ءُ شریں گیش ءُ گیوار گوں بلوچ راج ءِ آجوئی ءُ وتواکی ءِ منگ ءَ اِنت، ءُ اے پالیسی ھلاس کنگ بہ بنت کہ آ زوراکی ءُ مچی سزا ءَ گیش کن اَنت۔
آئی ءَ گوشتگ کہ اے مھم ءِ میان ءَ بی این اہم بلوچ ڈائسپورا ءُ میان استمانی انسانی ھکانی کارکنانی گون ءَ ھواری ءَ جتائیں میان استمانی پورماں اے جیڑہ ءَ پاشک کنت ءُ بلوچستان ءِ جاورانی نیمگ ءَ جھان ءِ دلگوش دیگ ءِ جھد ءَ کنت۔
بی این ایم گوں بلوچ کارکن ءُ سرجمیں جھان ءِ جاہ منندیں بلوچ ڈائسپورا ءَ لوٹ کنت آ اے مھم ءَ شریں وڑے ءَ بھر بزور اَنت۔ کج ءَ ھم بوت کنت گڑا دوزواہ اے سرگرمیاں تچک ءَ بھر بزور اَنت ءُ رسانکدر ءُ آن لائن راھبندانی رد ءَ بلوچستان ءِ جاورانی بابت ءَ سرپدی دیگ ءَ وتی کرد ءَ پیلو بہ کن اَنت۔
آئی ءَ گوشتگ کہ کانپرنس، زھرشانی، روانک ءُ آدگہ سپارتی ءُ سرپدی سرگرمیاں دیمتر ءِ روچاں شنگ کن ایں۔
بنشون: درشان. اکس: مونوگرام
