نیشنل ڈیموکریٹک پارٹی ( این ڈی پی ) ءِ جارکش ءَ بلوچستان ءَ برجاھیں زوراکی ءُ آئینی ھکانی یکشلیں لگتمالی ءِ سر ءَ بژن درشان کرتگ ءُ گوشتگ کہ بلوچستان ءَ دراجکشیں وھدے بیت کہ انسانی ھکانی لگتمالی، مالی جنجال، بے روزگاری ءُ دگہ بازیں جنجالانی دیمپان اِنت۔ ھمے ریاستی پالیسانی بگیری ءَ وھدے کہ مھلوک وتی آئینی ھک ءُ مڈیانی سر ءَ پہ واکداری ءَ توار چست کنت گڑا آیانی ھکی ئیں لوٹانی گوں سنگینی ءَ گوش دارگ ءَ ابید جمھوری تواراں پہ ریاست ءَ ترس لیک اَنت ءُ گوں زور ءُ آزاردھیاں آیانی ھلاس کنگ ءِ جھد ءَ کن اَنت۔
آئی ءَ گوشتگ کہ انوگیں روچاں پَنجگُور، بارکان، نوشکی، مکُران ءُ بلوچستان ءِ آدگہ ھنداں ورنایانی لاشانی دزکپگ سکا گنتریں جاوراں پیش دارگ ءَ اَنت۔زوریں بیگواھی سکا تیز کنگ بوتگ، بازیں کھولانی گوشگ اِنت کہ آیانی آزیز درکانودی آوار جنگ بوتگ اَنت ءُ آیانی تہ ءَ گیشتر کشندہ ٹولی ءِ کیس ھم ھوار اَنت کہ آیاں ورنا آزار داتگ ءُ آوار جتگ اَنت پد ءَ آیانی لاش جنگلاں چگل داتگ اَنت یا ادارھانی دست ءَ داتگ اَنت کہ بیگواہ کنگ بوتگ اَنت۔
آئی ءَ گوشتگ کہ ریاست ءُ شھریانی میان ءَ آئینی کول ءِ رد ءَ ریاست شھریانی جان، مال، شرپ ءُ بنکی ھکانی پھازداری ءِ پابند اِنت۔ چادر ءُ چاردیوالیانی لگتمالی، درکانودی دزگیری ءُ زوریں بیگواھی ءَ پد کوش ھمے کول ءِ بگیری اِنت۔
آئی ءَ گوشگ کہ نیشنل ڈیموکریٹک پارٹی ھمے گپ ءِ منوگر اِنت کہ اگاں اھوالکار، آمیدگس ءُ سیول سوسائٹی ءَ گوں آجوئی ءَ وتی کرد پیلو کنگ ءِ ھک دیگ بہ بیت گڑا زانگ بیت کہ بلوچستان ءِ برجاھیں جاور ءُ آزاردھیانی زمہ وار کئے اِنت۔ بلے بدبھتی ءَ بلوچستان ءَ نوک آبادکاری پالیسی برجاہ دارگ بوگ ءَ اَنت ءُ ایشی سوب بلوچ سرڈگار ءِ مڈیانی لٹ ءُ پل کنگ اِنت۔
آئی ءَ گوشتگ کہ نیشنل ڈیموکریٹک پارٹی ھمے لوٹ ءَ کنت کہ زوریں بیگواھی ءُ درکانودی کوش آمیدگس ءِ نیمگ ءَ پٹ ءُ پول کنگ بہ بنت ءُ سانمندیں کھول سرپدی دیگ ءُ گوں آیاں انساپ کنگ بہ بیت ءُ بلوچستان ءَ سیاسی جیڑہ ءِ گیش ءُ گیوار گوں زور ءَ نہ گوں آئین ءُ جمھوریت ءَ کنگ بہ بیت۔ بلوچستان ءِ مھلوک چونیں ھم ریا ءِ لوٹوک نہ اَنت بلکیں وتی آئینی ھک ءُ وتی مڈیانی واک ءُ سیاسی شرپ ءِ ھکدار اَنت۔
بنشون: درشان. اکس: مونوگرام