بلوچ نیشنل موومنٹ ( بی این ایم) ءِ نیمگ ءَ انسانی ھکانی میان استمانی روچ ءِ درگتءَ نیدرلینڈز ءِ شھر دی ھیگ ءَ روانک ءُ ڈچ پارلیمنٹ ءِدیم ءَ زھرشانی کنگ بیتگ۔
زھرشانی کنوکیں مردماں پلے کارڈ ءُ بینر گوں بیتگ کہ آیانی سر ءَ بلوچستان ءَ برجاھیں پاکستان ریاست ءِ زوراکی، زوریں بیگواھی، درکانودی کوشءُ بنکی انسانی ھکانی پادمالیانی بگیری ءَ اوگام نبشتہ بوتگ۔ آیاں بلوچستان ءَ برجاھیں انسانی ھکانی سر ءَ دلگوش گور کنگ ءِ لوٹ کرتگ۔
زھرشانی ءَ بی این ایم نیدرلینڈ چیپٹر ءِ سرکماش مھیم ابدرھیم، زھرہ بلوچ، سیپ بلوچ، مھرہ بلوچ ءُجیئے سندہ پریڈم موومنٹ ءِ کارکن ستار تران کرتگ ءُ گوشتگ کہ بلوچستا ن ءَ چنچو دھک اِنت انسانی ھک لگتمال کنگ بوگ ءَ اَنت۔ اود ءَ ھزارانی کچ ءَ بلوچ سیاسی کارکن، نودربر، استاد ءُ لس شھری زور بیگواہ کنگ بیتگ اَنت۔
آیاں گوشتگ کہ زور بیگواھیں مردمانی کھول چہ سالاں پہ وتی آزیزانی آجوئی ءَ جھد کنگ ءَ اَنت بلے آیاں انگت ءَ انساپ رسگ ءَ نہ اِنت۔
آیاں گوشتگ کہ بلوچستان ءَ تھنا مرد بیگواہ کنگ بوگ ءَ نہ اَنت بلکیں نوں جنین ھم پاکستانی پوج ءِ دست ءَ زوریں بیگواھیانی آماچ اَنت۔بلوچستان ءَ پاکستانی پوج ءِ نیمگ ءَ چہ شال ءَ ماہ جبین بلوچ، ھب ءَ پانزدہ سالیگیں نسرینہ بلوچ ءُ چہ دالبندینءَ گوں براتے ءَ ھوار گھارے ھم آوار جنگ بوتگ۔
آیاں گوشتگ کہ انسانی ھکانی میان استمانی روچ ءِ دار گ ءِ مول ھمیش اِنت کہ نزوریں توار داں جھان ءَ سر کنگ بہ بنت ءُ گوں آیاں انساپ کنگ بہ بیت۔ بلے بژن اِنت کہ بلوچستان اے وھد ءَ چہ میان استمان ءِ دلگوش ءَ زھر اِنت۔ بلوچستان ءِ جتائیں ھنداں پاکستانی پوج ڈرون ارش کنگ، میتگاں ارش کنگ ءُ مردماں پہ وتکشی ءَ لاچار کنگ ءَ اِنت۔ چہ اے درسیں زوراکیانی گندگ ءَ ابید اکوام متھدہ بے تواری ءَ بلوچستان ءِ انسانی ھکانی بگیریاں ندارگ کنگ ءَ اِنت۔
