آواران ءِ ھند جاؤ ءِ جاہ منند زور بیگواھیں سئید ھاسل ھان ھسرت ءُ دولت بلوچ ءِ کھول ءَ چہ انسانی ھکانی ادارھاں پہ آیانی آجوئی ءَ لوٹ کرتگ۔
کھول ءِ گوشگ اِنت کہ ھاسل ھان ھسرت ء ملا ابدرھمان ءُ دولت بلوچ ء ملا ابدلکریم جاؤ ءِ میتگ ملائی گزی ءِ جاہ منند اَنت کہ پاکستانی پوج ءَ 19 پروری 2014 ءَ چہ جند ءِ میتگ ءَ آوار جتگ ءُ بیگواہ کرتگ اَنت۔ مرچی آیانی زوریں بیگواھی ءَ دوازدہ سال سرجم بوتگ کہ ھچ وڑیں ھال نیست۔
آئی ءَ گوشتگ کہ ھمے روچ ءَ گوں ھاسل ھسرت ءُ دولت ءَ ھوار پاکستانی پوج ءَ چل ءُ ھشت مردم آوار جتگ ءُ بیگواہ کرتگ، آدگہ درسیں مردم یل کنگ بوتگ اَنت بلے ھاسل ھسرت ءُ دولت بلوچ انگت بیگواہ اَنت۔ چہ آیانی زوریں بیگواھی ءَ مئے سرجمیں کھول رنجانی دیمپان اِنت۔
کھول ءَ گوں سرکار ءَ لوٹ کرتگ ءُ گوشتگ کہ اگاں مئے مردمانی سر ءَچونیں ھم بھتامے ھست گڑا دیم ءَ آرگ ءُ آمیدگس ءَ پیش کنگ بہ بنت، بے میار اَنت گڑا زوت یل کنگ ءُ کھول چہ رنجاں کشگ بہ بیت۔
آئی ءَ گوں انسانی ھکانی ادارھاں لوٹ کرتگ کہ پہ ھاسل ھسرت ءُ دولت بلوچ ءِ آجوئی ءَ توار چست کنگ ءَ وتی کرد ءَ پیلو بہ کن اِت۔
ھاسل ھان ھسرت بلوچی زبان ءِ نامداریں شائر، اھوالکار، راجدوستیں جھدکار ءُ بلوچ نیشنل موومنٹ ءِ کلانھیں باسکے۔
بنشون: درشان اکس: دامگ
