پاکستانی پوجءِ دست ءَ زور بیگواھیں ورنا کاشپ بلوچ ء ِکھول ءَ وتی درشان ءَ گوشتگ کہ کاشپ بلوچ کراچی ءِ ھند لیاری ءِ جاہ منند اِنت کہ 18 پروری ءِ شپ ءِ دو ءَ پاکستانی پوج ءَ آوار جتگ ءُ بیگواہ کرتگ، چہ آئی زوریں بیگواھیءَ پد ھچ وڑیں ھال نیست۔
آئی ءَ گوشتگ کہ کاشپ بلوچ چہ ایشی ءَ پیش ھم 29 جولائی ءَسدر ءِ ھند اما ٹاور ءَ دکان ءَ آوار جنگ ءُ بیگواہ کنگ بوتگ اَت، لھتیں ماہ ءَ پد آجو بوتگ اَت۔ دوشی آ پد ءَ آ چہ گس ءَ آوار جتگ ءُ بیگواہ کرتگ۔
کھول ءَ گوشتگ کہ لیاری ءِ جتائیں ھنداں پولیس ءُ پاکستانی رینجر ءَ کاروائی ءِ میانءَ 13 مردم آوار جتگ ءُ بیگواہ کرتگ۔ انگتءَ چہ سرکار ءِ نیمگ ءَ پہ کاشپ ءِ بابتءَ ھچ وڑیں ھال نہ داتگ۔
آئیءَ گوں انسانی ھکانی ادارھاں لوٹ کرتگ کہ اگاں کاشپ بلوچ ءِ سر ءَ چونیں بھتامے ھست گڑا کانودءِ رد ءَ دیم ءَ آرگ ، اگاں بے میار اِنت گڑا زوت آجو کنگ بہ بیت۔
کول ءَ گوشتگ کہ کاشپ بلوچ یک دکاندارےءُ آگوں ھچ وڑیں درکانودی کاراں ھوار نہ بوتگ۔
بنشون؛درشان اکس: رسانکدر
