کراچی ءَ سی ٹی ڈی ءِ دروگیں میڑ ءَ زور بیگواھیں ورنا ءِ ناھکیں کوش ءِ بگیری ءَ کھول ءَ کراچی پریس کلب ءِ دیم ءَ زھرشانی کرتگ۔ زھرشانی ءَ زھگ ءُ زالبولاں ھوار بازیں کچے ءَ مردماں بھر زرتگ ءُ آیاں پلے کارڈ ءُ بینر دست ءَ بوتگ آیانی سر ءَ جتائیں اوگام نبشتہ بوتگ۔
زھرشانی کنوکاں گوشتگ کہ گولیمار ءِ جھمنندیں ورنا ھمدان ء مھمد الی زوربیگواھی ءَ پد دروگیں میڑ ءَ کشگ بوتگ۔ نوں آئی لاش ھم کھول ءِ دست ءَ دیگ نہ بوگ ءَ اِنت۔
ھمدان ءِ پت مھمد الی ءَ تران کرتگ ءُ گوشتگ کہ منی زھگ ھمدان بلوچ 29 دسمبر 2025 ءَ سی ٹی ڈی ءِ کارمنداں چہ دھوبی گاٹ پھل ءِ نزیک ءَ بے میار ءَ آوار جتگ۔ ۔ پد ءَ شش جنوری ءَ سی ٹی ڈی ءَ یک پریس کانپرنسے ءَ ٹاپار جتگ کہ ھمدان چہ رئیس گوٹ ءَ یک سلاہ بندیں گلے ءِ نزیکی ءُ کمکاری ءِ بنیاد ءَ دزگیر کرتگ۔
آئی گوشتگ کہ سے شمبے ءِ روچ ءَ سی ٹی ڈی ءِ نیمگ ءَ یک جارے ءَ گوشگ بوتگ کہ ھمدان بلوچ یک دیم پہ دیمی میڑے ءَ جنگ بوتگ ءُ آ جند ءِ سنگتانی تیرگواری ءَ نشانگ کرتگ۔
آیاں لوٹ کرتگ کہ اے ویل ءَ ھواریں سی ٹی ڈی ءِ سروک ءُ کارمندانی بگیری ءَ ارزی نبیسگ بہ بیت ءُ ھمدان بلوچ ءِ لاش چار ءُ ٹپاس کنگ بہ بیت ءُ راستی دیم ءَ آرگ بہ بیت۔
زھرشانی کنوکاں گوشتگ کہ اگاں مئے لوٹ منگ نہ بوت اَنت ما وتی زھرشانی ءَ گیش کن ایں۔
بنشون: اھوالکار اکس: رسانکدر
