بلوچی زبان ءِ نامداریں شائر مجید آجز ءِ لاش آئی جند ءِ میتگ کیچ ءِ ھند بالیچہ ءَ گلزمین ءِ میار کنگ بوتگ۔
بنشون ءِ رد ءَ مجید آجز ءِ جنازہ ءِ نیمگ ءَ بلوچی زبان ءِ شائر، گشندہ، سیاسی ءُ چاگردی کارکناں ھوار بازیں کچے ءَ مردماں بھر زرتگ۔ چہ تربت ءَ ھوار جتا جتائیں ھند ءُ دمگانی مردم پہ آئی گڈی دیدار ءَ اتکگ اَنت۔
بلوچی زبان ءِ نمیرانیں شائر مجید آجز ءِ شائری ءِ سے کتاب زدگ اُپاریں سمین، سِستگیں اوتاگ ءُ گوانزگیں مانش شنگ بوتگ اَنت۔ چہ اے کتابانی شنگ بوگ ءَ ابید آئی بازیں شئیرے بلوچی زبان ءِ نامداریں گشندھاں ھم گوشتگ۔
مجید آجز بالیچہ ءِ جاہ منند اِنت کہ چہ بلوچستان ءِ جاورانی ناگیگی ءِ سوب ءَ باز اِنت کہ آ مسکت، اومان ءَ درانڈیھ بوتگ۔ آدینگ ءِ سھب ءَ آئی ءَ دل ءَ گپتگ ءُ بیران بوتگ۔
مجید آجز ءِ بیرانی ءِ ھال ءِ اِش کنگ ءَ پد لبزانکی بھرگ ءَ ابید جتائیں بھرگاں سیادی داروکیں مردماں دلپدردی درشان کرتگ۔
مجید آجز ءِ لاش ءِ چہ کراچی ءَ داں بالیچہ ءَ روگ ءَ جتا جتائیں جاھاں مردماں پہ شرپ آئی لاش ءِ سر ءَ پل شانتگ۔
نمیرانیں مجید آجز ءِ گڈی وابجاہ ءِ سر ءَ بلوچی چادر تالان کنگ ءُ پل شانگ بوتگ۔
بنشون: اھوالکار. اکس: رسانکدر
