سامی: زورگریں پاکستانی لشکر ءَ بیڑ برتگ ءُ مردمے آوار جتگ، کھول ءَ زھرشانی ءَ دگ بند کرتگ۔
اھوالکار ءِ رد ءَ زور بیگواہ کنگ بوتگیں مردم ءِ نام واھد بکش ء پیر مھمد اِنت کہ سامی بلوچی بازار ءِ جھمنند اِنت۔ پاکستانی لشکر ءُ چیریں ادارھانی کارمنداں زی بیگاہ ءَ واھد بکش آوار جتگ ءُ بیگواہ کرتگ کہ انگت بیگواہ اِنت۔مرچی سھب ءَ واھد بکش ءِ کھول ءَ زھرشانی ءَ سی پیک دگ بند کرتگ ءُ نشتگ اَنت۔
آیانی گوشگ اِنت دانکہ واھد بکش آجو کنگ نہ بوتگ ما وتی زھرشانی ءَ برجاہ دار ایں۔
ھمے وڑ ءَ تمپ ءَ زورگریں پاکستانی لشکر ءَ دوشی ورنایے آوار جتگ ءُ بیگواہ کرتگ۔
اھوالکار ءِ رد ءَ زور بیگواہ کنگ بوتگیں ورنا ءِ نام اَبدالھالک ء رھمدل انت کہ تمپ ءِ میتگ کورجو ءِ جھمنند اِنت۔ زورگریں پاکستانی لشکر ءُ چیریں ادارھانی کارمنداں دوشی شپ ءِ یک ءَ گس ءَ بیڑ برتگ ءُ آوار جتگ۔
زورگریں لشکر ءَ بیڑ برگ ءِ میان ءَ گوں گِس ءِ آدگہ مردماں زوراکی کرتگ۔ گس ءِ سامانی پٹ ءُ پول کنگ ءِ ھواری ءَ بازیں سامان ھم لشکر ءَ برتگ۔
انچو گوشگ بوگ ءَ پیسر ءَ ابدلھالک ءِ بشام نامیں ناکو یے لشکر ءَ آوار جتگ ءُ بیگواہ کرتگ بازیں آزاد دیگ ءَ پد یل داتگ۔
اے کھول ءِ بارو ءَ گوشگ بوگ ءَ اِنت کہ مدام ریاست ءِ لشکر ءُ ھندی کشندہ ٹولی ءِ زوراکیانی آماچ اَنت۔
