بلوچ نیشنل موومنٹ ( بی این ایم ) ءِ انسانی ھکانی ادارہ پانک بلوچستان ءَ جتائیں ویلاں چار بلوچ ورنایانی کوش، درکانودی گامگیج لیگ لیک اتگ ءُ بژن درشان کرتگ۔
آئی ءَ گوشتگ کہ 12 پروری 2026 ءَ دشت شولیگ ءِ جاہ منند ءُ ھاجی داد ءِ زھگ کمال داد گْوادر ءِ ھند کنٹانی ءَ کشندہ ٹولی ءِ کارمنداں ھما وھد ءَ نشانگ کرتگ کہ آ واتری گْوادر ءَ روگ ءَ بوتگ۔ کمال داد 2025 ءَ بیگواہ کنگ بوتگ ءُ ماھے ءَ پد یل کنگ بوتگ۔ چہ ایشی ءَ پیش گْوادر ءِ ھند پکیر کالونی ءَ ارشے ءَ ٹپی بوتگ۔
آئی ءَ گوشتگ کہ نواب بلوچ ء ابداللہ پَنجگُور ءِ ھند پروم جاھین ءِ جاہ منند اِنت۔ 29 مئی 2025 پاکستانی پوج ءَ چہ پَنجگُور ءِ ھند جتکان ءَ گس ءَ آوار جتگ ءُ بیگواہ کرتگ۔ 13 پروری 2026 ءَ آئی تیرسپتگیں لاش چہ پَنجگُور ءِ ھند رکشان پھل ءِ نزیک ءَ دزکپتگ۔
پانک ءَ گوشتگ کہ 15 پروری 2026 ءَ جنگیان بلوچ درکانودی کشگ بوتگ ءُ آئی تیرسپتگیں لاش چہ پَنجگُور ءِ ھند شاپاتان ءَ دزکپتگ۔ جنگیان بلوچ ابدرشید ءِ زھگ ءُ پنجگور ءِ ھند پروم، جاھین ءِ جاہ منند اِنت۔ 26 مئی 2025 ءَ چہ گس ءَ آوار جنگ ءُ بیگواہ کنگ بوتگ۔
آئی ءَ گوشتگ کہ ھمے وڑ ءَ 14 پروری 2026 ءَ تمپ ءَ نودربر منھاس بلوچ ء ماسٹر زپر نشانگ کنگ ءُ کشگ بوتگ۔ ھندی مردمانی گوشگ اِنت کہ آ ریاست ءِ جوڑ کرتگیں کشندہ ٹولی ءَ نشانگ کرتگ ءُ کشتگ۔
پانک ءَ گوشتگ کہ اے ویل بلوچستان ءَ برجاھیں زوریں بیگواھی ءُ درکانودی کوشانی درچ اِنت۔اے وڑیں ویل بلوچستان ءَ انسانی ھکانی لگتمالیاں پیش دارگ ءَ اَنت کہ اود ءَ زوریں بیگواھی ءُ درکانودی کوش ءِ کیس یکشل ءَ دیم ءَ پیداک اَنت۔
بنشون: درشان. اکس: مونوگرام
