
تربت: زورگریں پاکستانی لشکر ءِ دست ءَ زوربیگواہ کرتگیں زمان جان ءُ ابولھسن ءِ کھول ءَ شھدگ بند کُرتگ ءُ زھرشانی ءَ نشتگ۔
زوربیگواھیں زمان ءُ ابولھسن ءِ کھول ءِ گوشگ اِنت کہ انتزامیہ ءِ دلجمی دیگ ءَ پد ھم زمان جان ءُ ابولھسن آجو کنگ نہ بوتگ انت۔ داں کہ آ یل کنگ مہ بنت ما سی پیک دگ ءَ بند کن ایں۔
آیاں گوشتگ کہ زوربیگواھیں زمان جان ءُ ابولھسن ھوتمان ءَ وتی گس ءَ لوٹائینتگ ءُ زوربیگواہ کرتگ اَنت کہ آیانی زوربیگواھی ءِ بگیری ءَ ما زھرشانی کُرتگ ءُ ھوشاپ شھدگ بند کرتگ اَت کہ انتزامیہ اتکگ ات ءُ مارا دلجمی داتگ اَت کہ زمان ءُ ابولھسن آجو کنگ بنت بلے مرچی پنچ روچ گوستگ انگت آجو کنگ نہ بوتگ اَنت۔
آیاں گوشتگ کہ دمگ ءِ انتزامیہ مدام دروگیں دلجمی دیگ ءُ ترسینگ ءَ اَنت۔ ما وتی زھرشانی پمشکا ھلاس کرتگ اَت کہ مئے مردم دو روچ ءِ تہ ءَ آجو کنگ بنت بلے انتزامیہ ءِ داتگیں مدت ءَ آ یل کنگ نہ بوتگ انت۔ مرچی ما پد ءَ سی پیک دگ بند کرتگ ءُ زھرشانی ءَ نشتگ ایں۔
آیاں گوشتگ کہ مرچی شپ ءَ داں مئے مردم آجو کنگ نہ بوت اَنت ما سی پیک دگ ءَ پچ نہ کن ایں۔