شال: پہ زوربیگواھیں مردمانی پد جنگ ءَ وائس پار بلوچ مسنگ پرسنز (وی بی ایم پی) ءِ زھرشانی گدان ءَ 6078 روچ سرجم بوتگ کہ گل ءِ چیرمین نسراللہ بلوچ ءِ سروکی ءَ شال پریس کلب ءِ دیم ءَ برجاہ بوتگ۔
اے درگت ءَ چہ جتائیں بھرگاں سیادی داروکیں مردم زھرشانی گدان ءَ آتکگ اَنت ءُ گوں بیگواھیں مردمانی کھولاں ھمدردی درشان کرتگ۔ آیاں بیگواھیں بلوچانی درکانودی کوش ءِ سر ءَ بژن درشان کرتگ ءُ زوربیگواھیں مردمانی آجوئی ءِ لوٹ کرتگ۔
وی بی ایم پی ءِ چیرمین نسراللہ بلوچ ءَ تران کرتگ ءُ گوشتگ کہ گل ءَ اے ھال سر بوتگ کہ پَنجگُور ءُ دکی ءَ چار بلوچ ورنا زوربیگواہ کنگ ءَ پد درکانودی کشگ بوتگ ءُ آیانی لاش چگل دیگ بوتگ اَنت۔آیانی نام مھمد پرید بلوچ، مھمد انور بلوچ، پزیر بلوچ ءُ کریم جان اِنت۔ آیانی کھولانی گوشگ اِنت کہ اے ورنا پاری ڈیھ ءِ ادارھانی کارمنداں آوار جتگ ءُ بیگواہ کرتگ اَنت ءُ رند ءَ آ کشگ بوتگ ءُ آیانی لاش چگل دیگ بوتگ اَنت۔
آئی گوشتگ کہ چار زوربیگواھیں بلوچ ورنایانی درکانودی کوش انسانی ھکانی گنتریں لگتمالی اِنت کہ ما ایشی ءَ گوں ترندیں دانکاں ایر جن ایں ءُ گوں سرکار ءَ لوٹ کن ایں کہ آ چاریں ورنایانی درکانودی کوش ءِ دلگوش ءَ گور بہ کنت ءُ ایشی بابت ءَ پٹ ءُ پول بہ کنت۔ ایشی زمہ وارانی بگیری ءَ کانودی کاروائی بہ کنت۔ پہ کھولانئ ڈیھ ءِ کانود ءِ رد ءَ انساپ دیگ ءَ وتی کرد ءَ پیلو بہ کنت۔
بنشون: درشان اکس: وی بی ایم پی
