بلوچ راجدوستیں سروک رھیم بلوچ ایڈوکیٹ ءَ وتی درشانے ءَ گوشتگ کہ پہ بلوچانی زوریں بیگواھی ءُ درکانودی کوش ءَ پاکستانی پوج ءُ چیریں ادارھانی گپ مرچی ھم کوھنیں دروگ اَنت کہ اسد اللہ مینگل ءُ اھمد شاہ کرد ءِ زوریں بیگواھی ءُ درکانودی کوش ءِ وھد ءَ زولپکار الی بٹو ءَ بندات کرتگ اَت۔
آئی ءَ گوشتگ کہ مرچی ھم پوج ءُ پھازداریں لشکر بلوچاں چہ گس ءُ مردمانی میان ءَ آوار جنگ ءُ چیریں آزار جاھاں برگ ءَ اَنت۔ اود ءَ آیاں روچ ءُ ماہ بلکیں داں سالاں بیگواہ کنگ ءُ آزار دیگ ءَ اَنت۔
رھیم بلوچ ایڈوکیٹ ءَ گوشتگ کہ چہ ایشی ءَ ابید ڈی جی آئی ایس پی آر مدام ھمے ٹاپار ءَ جنت کہ زور بیگواھیں بلوچ پوج ءِ بندیگ جاھاں نہ اَنت بلکیں کوہ، اوگانستان یا ایران ءَ اَنت۔
بلوچ سروک ءَ گوشتگ کہ سرکار، پارلیمان، آمیدگس ءُ بے زردیں رسانکدر ھمے دروگ ءِ راست کنگ ءِ کوشست ءَ اَنت، پد ءَ ھم پنجاپ ءِ مھلوک بے جست ءَ ایشی منّگ ءَ اَنت۔
بنشون: درشان. اکس: دامگ
