شال: پہ زوربیگواھیں مردمانی پد جنگ ءَ وائس پار بلوچ مسنگ پرسنز (وی بی ایم پی) ءِ زھرشانی گدان ءَ 6061 سرجم بوتگ کہ ترندیں برپگواری ءُ سردی ءَ ابید گل ءِ چیرمین نسراللہ بلوچ ءِ سروکی ءَ شال پریس کلب ءِ دیم ءَ برجاہ اِنت۔
وی بی ایم پی ءِ گوشگ اِنت کہ گل ھمے سرپد بیت زوریں بیگواھی ڈیھ ءِ کانود ءُ انسانی ھکانی گنتریں لگتمالی اِنت۔ گل ءِ دراجکشیں ءُ پرایمنیں زھرشانی ءِ مول ھمیش اِنت کہ ما پاکستان ءُ گیشتر بلوچستان ءَ چہ زوریں بیگواھی ءَ بہ رکین ایں۔ ما لوٹ ایں کہ سرکار ءُ ڈیھ ءِ ادارھانی سروک گوں سنگینی ءَ گپ بہ کن اَنت۔
آئی گوشتگ کہ ما ھمے لوٹ ایں کہ زوریں بیگواھی، انسانی ھکانی بگیری ءُ پہ درکانودی گامگیجانی سرجم ءَ ھلاس کنگ ءَ دلجمی دیگ بہ بیت۔ گوں شھریاں ڈیھ ءِ کانود ءِ رد ءَ پیش بہ بنت۔ درسیں زوربیگواھیں مردم دیم ءَ آرگ ءُ آیاں کانودی ھک دیگ بہ بیت۔پہ زوریں بیگواھی ءِ جیڑہ ءِ گیش ءُ گیوار کنگ ءَ ڈیھ ءِ کانود ءِ رد ءَ زوت گامگیج بہ زورگ بہ بیت ءُ سرکار وتی راھبندی زمہ واری ءَ پیلو بہ کنت۔
