بلوچ وومن پورم ءِ بنجاھی جارکش ءَ وتی درشان ءَ گوشتگ کہ ما چہ جیونی ءَ زور بیگواھیں بالاچ ھسن ءُ اھسان ھسن ءِ زوتیں آجوئی ءِ لوٹ ءَ کن ایں۔
آئی ءَ گوشتگ کہ 22 جنوری 2026 ءِ شپ ءَ دوئیں برات بالاچ ھسن کہ وانگجاھے ءِ ٹیچر اِنت ءُ اھسان ھسن یونیورسٹی ءِ گریجویٹ ءُ موبائل دکانے ءِ واھند اِنت آیانی گس ءَ سی ٹی ڈی ءُ چیریں ادارھانی کارمنداں درکانودی بیڑ برتگ ءُ آوار جتگ اَنت۔ داں انوں آیانی بابت ءَ ھچ سرپدی دیگ ءَ نہ اَنت۔
جارکش ءَ گوشتگ کہ ما ھمے سرپد بہ ایں کہ اے وڑیں درکانودی آوارجنی بلوچ راجی مچی سزا ءِ درچ اِنت کہ اے گوں ترندی ءَ گیش بوگ ءَ اِنت۔ اے وڑیں درکانودی کار چہ ریاستی ادارہ، سی ٹی ڈی ءُ چیریں ادارھانی نیمگ ءَ بوگ ءَ اَنت۔
آئی ءَ گوشتگ کہ اگاں چہ آوار جتگیں مردماں کسے میار بار اِنت گڑا کانود ءِ رد ءَ دزگیر کنگ ءُ آمیدگس ءَ پیش کنگ بہ بیت۔ بلے اد ءَ ریاست ءِ ادارہ ھندی ءُ میان استمانی کانوداں لگتمال کنگ ءَ اَنت۔ ما اے وڑیں درکانودی کاراں ھچ وڑ ءَ نہ منّ ایں۔
جارکش ءَ گوشتگ کہ ما نہ تھنا اے زوریں بیگواھی ءَ ایر جن ایں، بلکیں گوں ریاست ءُ آئی واکداراں لوٹ کن ایں کہ آ وتی ھمے بلوچ بگیریں پالیساں مٹ بہ کن اَنت۔ ما دوئیں برات بالاچ ھسن ءُ اھسان ھسن ءِ زوتیں آجوئی ءِ لوٹ ءَ کن این ءُ اے زوراکیاں ھواریں ادارھانی جست کنگ ءِ لوٹ ءَ کن ایں۔
