ھب چوکی ءَ پاکستانی پوج ءِ دست ءَ زور بیگواھیں نسرینہ بلوچ، ھانی بلوچ، ھیر النسا بلوچ، پاتمہ بلوچ، پرید بلوچ ءُ مجاھد بلوچ ءِ کھول ءَ آیانی زوریں بیگواھی ءِ بگیری ءَ لسبیلہ پریس کلب ءِ دیم ءَ زھرشانی کرتگ۔
زھرشانی ءَ زور بیگواھیں مردمانی کھولاں ابید بی وائی سی ءِ باسک ءُ آدگہ مردماں ھم بھر زرتگ۔ زھرشانی کنوکیں مردماں بیگواھیں مردمانی اکس ھم دستاں بوتگ اَنت۔
آیاں تران کرتگ ءُ گوشتگ کہ پیسر ءَ مئے ورنا آوار جنگ ءُ بیگواہ کنگ بوتگ اَنت، نوں مئے زالبول ھم بیگواہ کنگ بوگ ءَ اَنت آیانی تہ ءَ کسان امریں جنک ءُ لاپریں زالبول ھم ھوار اِنت۔ چہ وتی مردمانی بیگواھی ءَ سرجمیں کھول جنجالانی دیمپان اِنت۔
آیاں گوشتگ کہ مئے مردماں چونیں گناہ کرتگ کہ آ اے وڑ ءَ زور بیگواہ کنگ بوگ ءَ اَنت۔ اگاں کسے ءِ سر ءَ چونیں ھم بھتام ھست گڑا ڈیھ ءِ آمیدگس ءَ پیش کنگ بہ بنت۔ مردمانی اے وڑ ءَ بیگواہ کنگ ڈیھ ءِ کانود ءُ انسانی ھکانی تچک ءَ بگیری اِنت۔
آیاں گوشتگ کہ ما پہ وتی بیگواھیں مردمانی ایپ آئی آر ءَ پولیس ءِ کِر ءَ ھم شتگ ایں، بلے ایس ایچ او مئے مردمانی ایپ آئی آر ءَ ھم نبیسگ ءَ نہ اِنت۔ گڑا ما پہ وتی مردمانی انساپ لوٹگ ءَ کج ءَ برو ایں۔ ما پمشکا لاچار بوتگ این ءُ اد ءَ زھرشانی کنگ ءَ ایں۔
آیاں لوٹ کرتگ ءُ گوشتگ کہ مئے گون ءَ انساپ کنگ ءُ مارا مئے بیگواھیں زالبولانی بابت ءَ گوشگ بہ بیت کہ آ چون ءُ کج ءَ اَنت۔ اگاں مئے زالبول زوت آجو نہ بوت اَنت ما وتی زھرشانی ءَ گیش کن ایں۔
آیاں گوں انسانی ھکانی ادارھاں لوٹ کرتگ کہ پہ مئے زور بیگواھیں زالبولانی آجوئی ءَ توار چست بہ کن اَنت۔
