بلوچ یکجھتی کمیٹی ءِ جارکش ءَ وتی شنگ کرتگیں درشانے ءَ گوشتگ کہ بی وائی سی ءِ سروک ڈاکٹر ماہ رنگ بلوچ، بنجاھی باسک بیبگر بلوچ، سبگت اللہ شاہ جی، باسک گلزادی بلوچ، بیبو بلوچ ءُ نامداریں سیاسی مردم ماما گپار ءُ کامریڈامران بلوچ ءَ سے ماہ پیش درکانودی دزگیر کرتگ ءُ آ تھری ایم پی او ءِ رد ءَ بندیگ اَنت۔ آیانی وھد ھمک ماہ ءَ درکانودی گیش کنگ بیتگ۔ ڈاکٹر سبیہ بلوچ ءِ پت گوستگیں سے ماہ اِنت بیگواہ اِنت۔
آئی ءَ گوشتگ کہ یک ماھے ءَ پد کیس تھی کارانی تک ( ھوم ڈیپارٹمنٹ ) ءَ دیگ بیتگ ءُ پد ءَ آمیدگس ءِ کاروائی ھلاس کرتگ ءُ یکشل ءَ وھد دیگ ءِ ھیلہ کارگرگ بیتگ۔ داں سے ماہ ءَ تھری ایم پی او ءِ کانودی وھد ھلاس بیتگ بلے سروک یل کنگ نہ بیتگ اَنت۔ 22 جون ءَ تھری ایم پی او ءِ وھد ھلاس بیتگ۔ بلے پانزدہ روچ ءِ گوزگءَ پد ھم نہ یل کنگ بیتگ اَنت ءُ نہ آمیدگسی پتر ٹھینگ بیتگ، نہ گل یا کھولاں آیانی بندیگی ءِ بابت ءَ کانودی نیمون پیش کنگ بیتگ۔
آئی ءَ گوشتگ کہ زندانءِ مستر ھمید اللہ زوراکی کنگ ءَ اِنت، نہ تھنا سروکءُ آیانی کھولانی گون ءَ ترندی کنت بلکیں کانودی کاگداں ھم دز رند دیگ ءَ نہ اِنت۔ اے تچک ءَ درکانودی گامگیجے ءُ آمیدگس ءِ کارانی دیم ءَ اڑاند ودی کنگ اِنت۔
آئی ءَ گوشتگ کہ چہ اے درسیں کارپداں ھمے گندگ بیتگ کہ ریاست ءِ کِر ءَ پہ اے سیاسی سروکانی بندیگ کنگ ءَ ھچ وڑیں کانودی ءُ دودمانی نیمون نیست۔ اگاں آیانی بگیری ءَ پکائیں منانکے بوتیں داں انوں کانودی کاروائی سرجم بیتگ اَت۔ تھری ایم پی او ءِ وھد ءِ ھلاسی ءَ پد بندیگ کنگ انساپ ءِ راھبندانی بگیری اِنت۔
آئی ءَ گوشتگ کہ چہ ایشی ءَ آبید گڈانی زندان ءَ کامریڈ امران بلوچ ءِ یل بوگ ءَ پد زوت دزگیر کنگ ءُ یکبرے پد ءَ تھری ایم پی او ءِ رد ءَ بندیگ کنگ بیتگ اے کانود ءُ راھبند ءِ تچک ءَ بگیری اِنت۔ ھمے وڑ ءَ بیبو بلوچ ءِ پت گپار بلوچ مچی سزا ءِ رد ءَ شال ءَ ھدہ زندان ءَ بند کنگ بیتگ۔ ڈاکٹر سبیہ ءِ پت انگت ءَبیگواہ اِنت، اے مارا گیش بژنیگ کنت۔
آئی ءَ گوشتگ کہ ما اے گپ ءَ تچک ءَ گوش ایں کہ چہ اے وڑیں دزگیری ءُ ریاستی زوراکیاں نہ گوست ءَ نپ بوتگ ءُ نہ دیم ءَ بیت۔ چہ زوراکیءُ کانودءِ لگتمالی ءَ نہ مھلو ک ءِ گھگیری توار دارگ بیت ءُ نہ سیاسی زرمبشت ھلاس بیت۔ ما ھمے لوٹ ءَ کن ایں کہ مئے سروک زوت یل کنگ بہ بنت ءُ ریاست پہ سیاسی زرمبشتانی ھلاس کنگ ءَ وتی بے سوبیں زور ءِ چکاسگ ءُ زوراکیاں زوت بند بہ کنت۔
