بلوچ یکجہتی کمیٹی ءِ جارکش ءَ وتی درشانے ءَ گوشتگ کہ چاردہ سالیگیں نودربر راھی ء مھمد اسا ءَ پاکستانی پوج ءِ جوڑ کرتگیں کشندہ ٹولی ءِ کارمنداں نشانگ کرتگ ءُ کشتگ۔
جارکش ءَ گوشتگ کی ھندی مردمانی گوشگ انت کہ کسان سالیں راھی اسا ءَ کشندہ ٹولی ءِ کارمنداں ھوشاپ ءِ بازار ءَ تیر گواری کرتگ ءُ کشتگ ءُ جستگ اَنت۔
بی وائی سی ءَ گوشتگ کہ راھی اسا یک نودربرے بوتگ ءُ میان استمانی کانود ءِ رد ءَ زھگ پھریزگی اَنت ءُ گوں آیاں ھچ وڑ ءَ زوراکی کنگی نہ اِنت ۔ بلے چہ اے ریاست ءَ کس ھم پھریز نہ اِنت ۔ یک زھگے ءِ درکانودی کوش بنکی انسانی ھک ءُ میان ستمانی کانود ءِ بگیری اِنت ۔ آئی تہ ءَ کنوینشن پہ زھگانی ھکاں ھوار اِنت ۔ آ زھگانی زندگی ءِ ھک، پھریزگ ءُ سلامتی ءِ مانزمانی ءَ دنت۔
آئی دیمتر ءَ گوشتگ کہ اے ویل ءَ پد دمگ ءَ گیشتر ترس ودی بوتگ۔ ھندی مردمانی گوشگ اِنت کہ اے کوش بلوچستان ءَ برجاھیں پاکستانی پوج ءُ کشندہ ٹولی ءِ زوراکیاں پیش داریت۔
آئی گوشتگ کہ میان استمانی انسانی ھکانی گل ءَ لوٹ ایت کہ آ اے ویل ءِ زوت پٹ ءُ پول ءَ بہ کن اَنت زمہ وارانی بگیری ءَ زوت کانودی کاروائی کنگ بہ بیت ءُ بلوچستان ءَ کشندہ ٹولی ءِ کاروائی ھلاس کنگ بہ بنت۔
