بلوچ یکجھتی کمیٹی ءِ سروک سمی دین ءَ وتی شنگ کرتگیں درشانے ءَ گوشتگ کہ ریاست بلوچ ءَ یک راجے نہ بلکیں دژمنے لیک ایت۔ ریاست ءِ جیڑہ تھنا بلوچ ءِ جنگ، ناشرکاری ءِ گِر ءُ دار ءُ وتگڑیں زھریں بلوچ نہ اِنت بلکیں مستریں جیڑہ بلوچ ءِ پجار اِنت۔ ریاست ءَ گوں بلوچ ءِ ھمک ھما مردم ءَ جیڑہ ھست کہ آئی پجار بلوچ اِنت۔ ھمیشی رد ءَ بلوچ مرد، زالبول، ورنا ءُ کماش دانکہ کسانیں زھگ زور بیگواہ یا کشگ بوگ ءَ اَنت۔ ھمے چکچینی پالیسی وت ھمے راستی ءَ پیش دار ایت کہ ریاست ءَ گوں بلوچ ءِ ھستمان ءَ جیڑہ اِنت، گوں آئی گھگیری ءَ نہ بلکیں پجار اِنت۔
آئی ءَ گوشتگ کہ ناشرکاری ءُ ناشرکاری ءِ گِر ءُ دار ءِ گپ بس یک نیمونے، ھمیشی پشت ءَ ریاست وتی بلوچ چکچینی ءَ برجاہ دار ایت ءُ جھان ءِ دیم ءَ ایشی ءَ راست پیش کنگ ءِ جھد ءَ کنت۔ اگاں اے وڑ نہ اِنت گڑا کودکیں زالبول، لاپریں زالبول ءُ سیزدہ سالی زھگانی آوار جنگ کجام ناشرکاری ءِ گِر ءُ دار ءَ ھوار کنگ بیت۔
سمی دین ءَ گوشتگ کہ ما وھدے بلوچ چکچینی ءِ گپ ءَ کن ایں گڑا مارا ھمے گوشگ بیت کہ اے گپ دروگ اَنت۔ گڑا پہ بلوچ راج ءَ مستریں چکچینی کجام بہ بیت پہ آئی ھلاس کنگ ءَ درسیں سیمسر گواز کنگ بہ بنت، مرد، زالبول، کماش ءُ زھگانی میان ءَ شرپ ھم ھلاس کنگ بہ بیت۔
آئی ءَ گوشتگ کہ ما ھمے اش کرتگ شرپمندیں راج دژمنی ءُ جنگی جاورانی میان ءَ ھم جنگ ءُ زھگاں گستا لیک اَنت۔ بلے بلوچ ءِ بدبھتی ھمیش اِنت کہ انچیں دژمنے گمان کنگ ءَ اِنت آئی کِر ءَ شرپ ھچ پشت نہ کپتگ، ءُ انسانیت، ڈیھ ءُ میان استمانی آئین ءُ کانود ءِ گپ ءَ ھچ بستار نیست۔ چی ءَ کہ اے ڈیھ ءَ ابید چہ کاگدی ٹاپار ءَ دگہ ھچ پشت نہ کپتگ۔
