بلوچستان آجوئی سنگر ( بی ایل ایپ ) ءَ مشکے ءِ ھند شردوئی تنک ءَ 31 مارچ 2024 ءَ زورگریں پاکستانی لشکر ءِ کارمندانی سر ءَ بوتگیں بمب ارش ءِ تامر چہ وتی رسانکدری تندجاہ ” آشوب چینل ” ءَ شنگ کرتگ۔
دو دمان ءُ سی ءُ ھپت کترہ ءِ تامر ءَ گندگ بیت کہ زورگریں پاکستانی لشکر ءِ کارمند پیادگ ءَ روگ ءَ اَنت گوں چیریں کرتگیں شورھاں نشانگ کنگ بنت۔ چہ لشکری کارمنداں سے کارمند گوز ایت ءُ پشت ءَ دو کارمند ھواری ءَ روگ ءَ اَنت کہ چیرکرتگیں شورھانی زد ءَ کپ اَنت ءُ جاھی مر اَنت۔ چہ ایشاں یکے کمو ساری روگ ءَ بیت کہ آ ٹپی بیت۔
یات بہ بہ اِت کہ یک اپریل 2024 ءَ بی ایل ایپ ءِ جارکش میجر گھرام ءَ ماں رسانکدر ءَوتی شنگ کرتگیں درشانے ءَ ارش ءِ زمہ واری من اتگ ءُ گوشتگ کہ سرمچاراں مشکے ءِ تنک ءَ پاکستانی لشکر ءِ سر ءَ دو اُرش کُرتگ۔ پیسر ءَ پیادگیں ٹولی گوں شورھاں نشانگ کُرتگ ءُ پد ءَ آیانی کمک ءَ آتکگیں کارمندانی سر ءَ سنگر گِپتگ ءُ نشانگ کُرتگ اَنت۔
آئی ءَ گوشتگ کہ تنک ءَ شردوئی ءَ سرمچاراں دژمنیں لشکر ءِ پیادگیں ٹولی گوں چیرکُرتگیں شورھاں نشانگ کُرتگ، بمب تراک ءِ آسر ءَ دو کارمند مُرتگ ءُ یکے ٹپی بیتگ۔ایشانی کمک ءَ اتکگیں کاروان ءِ سر ءَ سرمچاراں چہ نزیک ءَ اُرش کُرتگ کہ یک کارمندے مرتگ ءُ دو ٹپی بیتگ۔ اُرشاں پد دوئیں لاش ءُ ٹپی بوتگیں کارمند ءِ لاش ءِ برگ ءَ بالیگ جنگجاہ ءَ اتکگ اَنت۔
