پنجگور: بلوچ یکجھتی کمیٹی ءِ نیمگ ءَ بلوچ چکچینی ءِ بگیری ءَ پروم ءَ زھرشانی روانکے کشگ بوتگ۔ زھرشانی روانک چہ جائین درکپتگ ءُ دکانانی دیم ءَ ترّ ءُ گرد کنگ ءَ پد تھسیل ءِ دیم ءَ مچ بوتگ اَنت۔
بی وائی سی ءِ زھرشانی روانک ءَ چہ جائین پروم ءَ ابید آدگہ کِر ءُ کشانی جتائیں جاھانی مردماں بازیں کچے ءَ بھر زرتگ۔
زھرشانی ءَ زور بیگواھیں مردمانی کھول، سیاسی ءُ چاگردی کارکن، زھگ ءُ جنیناں ھوار جتائیں بھرگاں سیادی داروکیں مردماں بازیں کچے ءَ بھر زرتگ۔
زھرشانی کنوکیں مردماں زور بیگواھیں مردمانی اکس، بینر ءُ پلے کارڈ دستاں بوتگ اَنت۔ آیاں زوریں بیگواھی ءُ بلوچ چکچینی ءِ بگیری ءَ اوگام جتگ ءُ بیگواھیں مردمانی آجوئی ءِ لوٹ کرتگ۔
آیاں گوں وتگڑیں سرکار ءَ لوٹ کرتگ ءُ گوشتگ کہ بلوچستان ءَ زوریں بیگواھی بند کنگ بہ بیت ءُ درسیں بیگواھیں مردم آجو کنگ بہ بنت، اگاں کسے ءِ سر ءَ چونیں بھتامے ھست گڑا آمیدگس ءَ پیش کنگ بہ بنت۔
زھرشانی کنوکیں مردماں چہ میان استمانی مردمی ھکانی اداھاں لوٹ کرتگ بلوچستان ءَ پاکستانی لشکر ءِ زوراکیانی سر ءَ وتی دلگوش ءَ گور بہ کنت ءُ سانمندیں کھولانی انساپ دیگ ءَ وتی کرد ءَ پیلو بہ کنت۔
