چہ ھب چوکی ءِھند دارو ھوٹلءَ سآوارجنگ بوتگیں نسرینہ بلوچ ءِ کھول ءَ چہ وی بی ایم پی ءِزھرشانی گدانءَ پریس کانپرنس کرتگ ءُ گوشتگ کہ 22 نومبر ءِ شپ ءِ ادار یازدہ ءَ ایپ سی، سی ٹی ڈی ءُ چیریں ادارھانی کارمنداں مئے گس ءَ بیڑ برتگ ءُ گس ءِ سامان پروشتگ اَنت ءُ نسرینہ بلوچ آوار جتگ ءُ گوں وت برتگ۔ نسرینہ بلوچ ءِ آوارجنی ءِ پژدر ءَ مارا بیھار داتگ اِش کہ اگاں اے ویل ءِ بابت ءَ گوں کس ءَ گپ مکن اِت۔
آئی گوشتگ کہ ما اے ءَ پد پہ انساپ لوٹگ ءَ ھمک در ٹک اتگ۔ سی ٹی ڈی ءِ کارگس ءَ شتگ ایں کہ اود ءَ مارا ھمے دلجمی دیگ بوتگ کہ لھتیں جست ءُ پرساں پد نسرینہ بلوچ یل کنگ بیت۔ بلے نوں یک ماھے گوستگ نہ کہ آئی آوارجنی ءِ ایپ آئی آر نبیسگ بوگ ءَ اِنت ءُ نہ آئی بابت ءَ مارا سرپدی دیگ بوگ ءَ اِنت۔ ما چہ نسرینہ بلوچ ءِ زوریں بیگواھی ءِ سوب ءَ سسائی جنجالانی دیمپان ایں۔
آئی گوشتگ کہ ما گوں درسیں بھرگاں سیادی داروکیں مردماں لوٹ کن ایں کہ آ مئے توار جوڑ بہ بنت ءُ مارا کمک بہ کن اَنت۔ ۔اے تھنا یک کھولے ءِ جیڑہ نہ اِنت بلکیں پہ سرجمیں چاگرد ءَ یک ترسناکیں درورے۔
آئی ءَ گوشتگ کہ ما اے ھپتگ ءَ وائس پار بلوچ مسنگ پرسنز ءِ گدان ءَ نندین ءُ وتی زھرشانی ءَ برجاہ داریں ءُ زوت چہ ھمے گدان ءَ یک زھرشانی یے ءِ جارے جنگ بیت۔
