بلوچ نیشنل موومنٹ (بی این ایم ) ءِ نیمگ ءَ ماں لندن ءَ شھید بانک کریمہ بلوچ ءِ شھیدی ءِ پنچمی سالروچ ءَ برجم داشتگیں مراگش ءَ بی این ایم ءِ چیئرمین ڈاکٹر نسیم بلوچ ءَ تران کرتگ ءُ گوشتگ کہ بانک کریمہ ءِ شھیدی یک سکا مزنیں ویلے۔ بلے بلوچ راج وتی شھیداں آ ھساب ءَ یاد نہ کنت کہ جھان گمان کنت، بلکیں مئے شھید مارا توکل بکش اَنت۔ بانک کریمہ ءَ ھم ھمے گپ ءِ سر ءَ ستک بوتگ۔ آئی ءَ چہ گم ءُ رنجاں وتی توکل نزور نہ کرتگ، بلکیں آئی رنجانی دیم ءَ گھگیری کرتگ۔
آئی ءَ گوشگ کہ بانک کریمہ بلوچ چہ ھزارانی کچ ءَ کلومیٹر دوری ءَ چہ وتی منشا ءَ نہ یتکگ بلکیں آئی جند ءِ سرڈگار ءَ جاور ناگیگ بوتگ اَنت ءُ آ پہ لاچاری اتکگ۔ پد ءَ آ ھم آ درانڈیھ ءَ ایمن، بے توار نہ بوتگ ءُ وتی زاتی واھشتانی رندگیری نہ کرتگ۔
ڈاکٹر نسیم بلوچ ءَ گوشتگ کہ گندگ ءَ بلوچ، سندھی، پشتون ءُ کشمیری مھلوک ءِ درد ءُ رنج چہ یکے دومی ءَ جتا اَنت بلے درسانی سوب ھمے یکین اِنت۔ اے درسیں درد ءُ رنجانی بنیاد یکیں پنجاپی ءِ سروکی ءَ برجاھیں ریاست پاکستان اِنت۔
آئی ءَ گوشتگ کہ بانک کریمہ مدام ھمے ترانگ ءَ گیج ایت دانکہ نزوریں راج وتی جھد ءَ گستا سرپد بہ بنت گڑا نوک آبادکاریں ریاست گیشر نپ چست کنت۔ پاکستان ریاست مئے نزوریں راجانی درد ءُ رنجاں بھر ءُ بانگ کنگ لوٹ ایت دانکہ مئے گھگیری ھم گستا بہ بیت۔ گڑا مارا اے درچ ھلاس کنگ ءُ گوں یکے دومی ءَ ھمگرنچ بوگ ءُ توانمند بوگی اِنت۔
ڈاکٹر نسیم بلوچ ءَ گوشتگ کہ بانک کریمہ یک انچیں دمگے ءَ شھید بوتگ کہ آ جھان ءِ شرپمندیں دمگ زانگ بیت، بلے آئی شھیدی ءَ پنچ سال گوستگ انگت ءَ پہ آئی کوش ءِ بابت ءَ ھچ وڑیں راستی دیم ءَ آرگ نہ بوتگ۔ ساجد ھسین ءِ لاش ھم چہ یورپ ءَ دزکپتگ بلے پہ آئی کیس ءَ ھم انساپ کنگ نہ بوتگ۔
آئی ءَ گوشتگ کہ شھید بانک کریمہ زانتگ کہ پاکستان ریاست ءَ تھنا مئے سرڈگار دستیگ نہ کرتگ، مئے گوستانک، مئے زبان، مئے مڈی ءُ مئے چاگردی وتواکی دستیگ کرتگ۔
