امریکی ریاست کیلیپورنیا ءِ جھمنند ڈیموکریٹک پارٹی ءِ بریڈ شرمن ءَ ماں چاگردی رسانکدر ایکس ءَ سندھی پاؤنڈیشن ءِ سروک سوپی لگاری ءُ آئی لوگبانک ءِ گون ءَ گند ءُ نند ءِ بارو ءَ نبشتگ کہ من دمگدار ءِ کارگس ءَ گوں سندھی پاؤنڈیشن ءِ سوپی لگاری ءُ آئی لوگبانک پاتمہ ءَ دیستگ باز وش بوتگ آں۔
آئی ءَ گوشتگ کہ سوپی لگاری ءُ آئی لوگبانک پاکستان ءِ نیمگ ءَ سند ءُ بلوچستان ءَ درکانودی زوریں بیگواھی ءُ درکانودی کوش ءِ ھلاسی ءِ لوٹوک اَنت۔
بریڈ شرمن ءَ زوریں بیگواھی ءِ بگیری ءَ برجاھیں انوگیں بلوچ یکجھتی کمیٹی ءِ زھرشانیانی منانک داتگ ءُ گوشتگ کہ پاکستان ءَ زوریں بیگواھی ءِ وڑیں درکانودی ءُ درمردمی کار ءِ بگیری ءَ زرمبشت ءِ سروکی کنوکیں ماہ رنگ 16 سال ءِ بوتگ پاکستانی لشکر ءَ آئی پت گپار لانگو دو سال ءِ زوریں بیگواھی ءَ پد کشتگ۔
امریکی کانگریس مین ءَ گوشتگ کہ ماہ رنگ گوں آدگہ بلوچ جنینانی ھمراھی ءَ زوریں بیگواھی ءِ بگیری ءَ یک دراجکشیں زھرشانی یے ءِ بھر اِنت، ایشی ءِ تہ ءَ پاکستان ءِ زوریں بیگواھی ءُ درکانودی کوش ءِ ھلاسی ءِ لوٹ ھوار اِنت۔
امریکی کانگریس بریڈ شرمن ءَ پاکستان سرکار زور داتگ ءُ گوشتگ کہ آ بلوچستان ءَ ھوار سند ءَ زوریں بیگواھی ءُ دروگیں میڑاں شھریانی کوش ءَ ھلاس بہ کنت۔
