بلوچستان لبریشن پرنٹ ( بی ایل ایپ ) ءِ جارکش میجر گھرام بلوچ ءَ وتی شنگ کرتگیں درشانے ءَ گوشتگ کہ بی ایل ایپ ءِ سدو آپریشن بٹالین ( سوب ) ءِ سرمچاراں 30 نومبر ءِ ھشت ءُ نوزدہ ءَ چاگی ءِ ھند نوکنڈی ءَ برگیڈ ھیڈ کوارٹر ءِ سر ءَ ارش کرتگ ءُ بنجل ءِ میان ءَ سیندک ءُ ریکوڈک شوربندیانی دری نوکرانی کارگس ءُ گسانی کمپاؤنڈ ءَ سر بوگ ءَ سوبین بوتگ اَنت۔ سوب ءِ سرمچاراں کمپاؤنڈ ءَ ساڑی ئیں درانڈیھ ءِ مردم دزگیر کرتگ اَنت۔
آئی ءَ گوشتگ کہ پاکستانی پوج ءَ سرمچارانی بگیری ءَ وتی برزی ءُ ایس ایس جی کمانڈو، نوکین ءُ مزنیں سلاہ کارگپتگ اَنت بلے سرمچاراں پوج ءِ ھمک ارش بے سوب کرتگ ءُ پہ پدکنزگ ءَ لاچار کرتگ اَنت۔ اے میان ءَ گل ءَ زورگریں پوج موہ داتگ کہ آ مئے لوٹاں بہ منّ ایت۔ چہ گل ءِ اے لوٹ ءَ 18 ادار ءَ پد پاکستانی پوج ءَ زور کارمرز کرتگ ءُ کمپاؤنڈ ءِ تچک ءَ گوں توپ ءُ وتسریں ارشاں نشانگ کنگ بندات کرتگ ایشی آسر ءَ زورگریں پوج ءُ سرمچارانی میان ءَ ترندیں میڑے بندات بوتگ ءُ داں سرمچارانی شھیدی ءَ آسر بوتگ۔ سدو آپریشنل بٹالین ءِ اے آپریشن ءَ درانڈیھ ءِ دزگیریناں ھوار 76 پوجی مرتگ ءُ شش سرمچار شھید بوتگ۔
جارکش ءَ گوشتگ کہ سدو آپریشنل بٹالین ءِ نوکنڈی آپریشن بلوچستان ءِ آجوئی ءُ مڈیانی پھریزگ ءَ بی ایل ایپ ءِ دیریگیں سلاہ بندیں گھگیری شوربندیانی درچ اِنت۔
آئی ءَ گوشتگ کہ آسپ بلوچ پنام ھالد بلوچ ء گلام جان دزپروم ءِ جاہ منند اِنت آئی نوکنڈی ءَ سدو آپریشنل بٹالین آپریشن ءِ کمانی کرتگ۔ آسپ 2013 ءَ بی ایل ایپ ءَ ھوار بوتگ ءُ پہ کار ءَ 2024 ءَ سدو آپریشن بٹالین ( سوب ) گچین کرتگ۔ آسپ بلوچ پنام ھالد بلوچ جنگی ھیلکاری ءِ رپک، شوربندی ٹھینگ ءُ سلاھانی شریں وڑے ءَ کارگرگ ءَ بلد بوتگ۔ کماندار آسپ بلوچ ءَ بے مٹیں بودناکی پیش داشتگ اَنت ءُ داں سی ءُ شش ادار ءَ دژمنیں پوج ءِ بگیری ءَ آپریشن برجاہ داشتگ ءُ داں گڈی دم ءَ شریں وڑے ءَ سروکی کنگ ءُ نہ ترسی ءَ جنگ دیان ءَ 2 دسمبر 2025 ءَ شھید بوتگ۔
آئی ءَ گوشتگ کہ انایت ساھل پنام گھرام بلوچ ء اسھاک سولیر گچک ءِ جاہ منند اِنت، اے میڑ ءَ نوکنڈی ءَ کمک کمان ءِ بستار ءَ وتی زمہ واری پیلو کرتگ اَنت۔ انایت ساھل بلوچ 2017 ءَ بی ایل ایپ ءَ ھوار بوتگ ءُ 2023 ءَ پہ وتی راجی ھزمتگاری ءَ سدو آپریشنل بٹالین ءَ بھر زرتگ۔ آئی ءَ پہ وتی آپریشن ءِ سوبین کنگ ءَ کمک کمان ءِ بستار ءَ پوجی بودناکیانی پیش دارگ ءَ جوانیں کرد پیلو کرتگ۔
جارکش ءَ گوشتگ کہ سرمچار زرینہ رپیک پنام ترانگ ماھو ء ماسٹر رپیک اھمد سنگ آباد ءِ جاہ منند اِنت ءُ 2022 ءَ بی ایل ایپ ءَ ھوار بوتگ ءُ 2024 ءَ پہ وتی راجی ھزمتگاری ءَ سدو آپریشنل بٹالین گچین کرتگ ءُ اے گھتریں کاروائی ءِ بھر بوتگ ءُ بی ایل ایپ ءِ بنداتی جندندری زالبولیں سرمچار بوتگ۔ سرمچار بانک زرینہ بلوچ ءَ نوکنڈی ءَ برگیڈ ھیڈکوارٹر ءِ مزنیں بیریئرز ءَ پدائی کرتگ ءُ بیریئرز پروشتگ ءُ پہ وتن ندر بوتگ ءُ وتی سرمچاریں سنگت برگیڈ ھیڈ کوارٹر ءَ پترینگ ءُ ریکوڈک ءُ سیندک شوربندی ءِ دری نوکرانی کمپاؤنڈ ءَ سر کنگ ءِ راہ پچ کرتگ۔
آئی ءَ گوشتگ کہ نبیل اھمد پنام استاد آدل بلوچ ء ھاجی مھمد اسھاک پَنجگُور، سند ءِ سر ایسائی ءِ جاہ منند اِنت 2020 ءَ بلوچ راجی زرمبشت ءَ ھوار بوتگ ءُ 2024 ءَ پہ وتی جنگی پرز ءَ سدو آپریشنل بٹالین گچین کرتگ۔ نبیل اھمد پنام استاد آدل نوکنڈی ءَ گوں نہ ترسی ءُ پوجی بودناکی جوانیں وڑے ءَ پیش کرتگ اَنت ءُ دژمنیں پوج تاوان داتگ ءُ 2 دسمبر ءَ شھید بوتگ۔
جارکش ءَ گوشتگ کہ میر جان پنام جانان بلوچ ء مھمد رھیم بلوچ ھسن آباد مسکانی کلات ھاران ءِ جاہ منند اِنت 2024 ءَ بی ایل ایپ ءَ ھوار بوتگ ءُ پہ وتی راجی پوجی کاراں 2025 ءَ سدو آپریشنل بٹالین گچین کرتگ۔ میرجان میرل پنام جانان بلوچ گوں توکل ءُ نہ ترسی ءَ وتی سرمچاریں سنگتانی ھمراھی ءَ نوکنڈی ءَ دژمنیں پوج تاوان داتگ ءُ شھید بوتگ۔
آئی ءَ گوشتگ کہ گلام جان پنام استال بلوچ ء پیز مھمد بلیدہ میناز ءِ جاہ منند اِنت پروری 2024 ءَ بی ایل ایپ ءَ ھوار بوتگ ءُ پہ راجی وشھالیں بانداتے ءَ 2025 ءَ سدو آپریشنل بٹالین گچین کرتگ۔ آ گوں سرمچاریں ھمبلاں نوکنڈی ءَ سدو آپریشن بٹالین ءِ بنداتی سوبمندیں کاروائی ءِ بھر بوتگ ءُ دژمن ءِ بگیری ءَ گوں نہ ترسی ءُ پوجی بودناکیاں مڑ اتگ ءُ شھید بوتگ۔
میجر گھرام بلوچ ءَ گوشتگ کہ بی ایل ایپ نوکنڈی برگیڈ ھیڈکوارٹر ءَ سیندک ءُ ریکوڈک ءِ وڑیں نوک آبادکاری لٹ ءُ پلی شوربندیاں دری نوکرانی کارگس ءُ گسانی کمپاؤنڈ ءَ شھید بوتگیں سرمچاراں ستک شانی ندر کنت ءُ ھمے کھول ءَ کن ایں داں بلوچستان ءِ آجوئی ءَ زورگریں پوج ءِ بگیری ءَ وتی کاروائیاں برجاہ دار ایں۔ ما درسیں دری باپاریاں گوشگ لوٹ ایں کہ بلوچستان ءَ باپاری کنگ ءِ ھک تھنا بلوچ ءِ اِنت ءُ ایشی زورگریں ریاست نہ تھنا گوں بلوچستان ءِ آجوئی ءَ کنگ بیت۔
