لندن: ویسٹ منسٹر ءَ یک دیوانے ءِ میان ءَ لیبرپارٹی ءِ بارلیمانی باسک جان میکڈونل ءَ ھاؤس آپ کامنز ءَ بلوچستان ءِ جاورانی سر ءَ گپ جتگ ءُ بلوچ جنین ماہ جبین ءُ نسرین ءِ آوارجنی ءُ بلوچستان ءَ کاروائیاں ڈرون اُرش ءِ بابت ءَ بژن درشان کرتگ۔ اے بابت ءَ جان میکڈونل ءَ سے نبشھی جست پارلیمان ءَ یاداشت کرتگ ءُ یکے ” اِرلی ڈے موشن “ ءَ ھم پیش کرتگ۔ اے درسیں نکات برتانیہ پارلیمنٹ ءِ سرکاری ریکارڈ ءَ ھوار کنگ بیتگ اَنت ءُ سرکار داں سے روچ ءِ میان ءَ اے نبشتھی جستانی پسو ءَ بہ دنت۔
جان میکڈونل ءِ ارلی ڈے موشن ءَ بلوچستان ءَ بیوکیں انوگیں رپورٹانی سر ءَ بژن درشان کنگ بیتگ کہ پنچ اکتوبر 2025 ءَ ھزادر ءِ ھند زھری ءَ بیتگیں ڈرون ارش ءَ شش مردم بیران بیتگ کہ آیانی تہ ءَ چار زھگ ھم ھوار اِنت۔ ماہ جبین بلوچ یک نودربرے 29 مئی 2025 ءَ زور بیگواہ کنگ بیتگ ءُ 22 نومبر 2025 ءَ کسان سالیں نسرین بلوچ ءِ آوارجنی ءِ سر ءَ ھم گپ جنگ بیتگ۔
چہ ایشاں ابید 17 نومبر 2025 ءَ پاکستانی پوج ءِ دست ءَ دزگیر بیتگیں پنچ جنینانی ھم دزگیری ءِ بابت ءَ گپ جنگ ءُ بژن درشان کنگ بیتگ کہ اے مچی سزا ءِ درچ اِنت۔
گوں برتانیہ سرکار ءَ لوٹ کنگ بیتگ کہ اے ویلانی بابت ءَ گامگیج زورگ بہ بیت ءُ وزیراں ھمے سدکی داتگ کہ برتانیہ ءَ بلوچستان ءِ جیڑھانی سر ءَ گوں پاکستان سرکار ءَ گپ جنگ بیت۔
بلوچ نیشنل موومنٹ ( بی این ایم ) ءِ رد ءَ ھمک سال برتانیہ ءِ گوں کانود سازاں رھوت کنگ بیتگ داں انوں شش پارلیمان ءِ باسکاں اے جیڑہ ءِ سر ءَ چہ سرکار ءَ نبشتھی جستانی پارست ءَ پسو لوٹ اِتگ۔
